දිවයිනේ සියලුම ජාතික සහ පළාත් පාසල්, පෞද්ගලික පාසල් හා ජාත්‍යන්තර පාසල් සහ සියලු පිරිවෙන්වල ලබන සියලු ම සිසුන් සඳහා අධ්‍යාපන අමාත්‍යාංශය මඟින් හඳුන්වා දුන් සුරක්ෂා සිසු රක්ෂණාවරණයේ ප්‍රතිලාභ ලබාගැනීම වේගවත් වී තිබෙනවා.
පසුගිය දා කිසියම් පිරිසක් විසින් විනාශකර දමන ලද සාම්පූර් සූඩයිකුඩා ප්‍රදේශයේ පිහිටි දාගැබ ඇතුලත් ප්‍රදේශය පුරාවිද්‍යා දෙපාර්තමේන්තුව බාරයට ගෙන සංරක්ෂණයට ඉදිරියේදී පියවර ගන්නා බව පුරාවිද්‍යා අධ්‍යක්ෂක ජෙනරාල් මහාචාර්ය පී.බී.මණ්ඩාවල මහතා පවසනවා.
ත්‍රස්තවාදීන් පරාජය කිරීමෙන් අනතුරුව වසර ගණනාවක් තිස්සේ උතුරු,නැගෙනහිර පුරාවස්තු සංරක්ෂණය කිරීම සදහා විධිමත් ක්‍රියාමාර්ග අනුගමනය කර නොතිබු අතර 2015 වසරෙන් පසුව මේ සඳහා විශේෂ වැඩසටහන් කිහිපයක්ම ක්‍රියාත්මක කර තිබෙනවා. ඒ අධ්‍යාපන ආමාත්‍ය අකිල විරාජ් කාරියවසම් මහතාගේ උපදෙස් මතයි.
පසුගියදා කිසියම් පිරිසක් විසින් විනාශ කර තිබු සාම්පූර් දාගැබට අදාල නටඹුන් ද ඉකුත් දා මතුකර ගනු ලැබුවේ එම පුරාවිද්‍යා ගවේෂණය අදාලවයි. එය පුරාවිද්‍යා සංරක්ෂණ ස්ථානයක් ලෙස නම් කිරීමට ප්‍රථම කිසියම් කණ්ඩායමක් විසින් මෙම විනාශය කර සිදුකර තිබෙනවා.
පුරාවිද්‍යා අධ්‍යක්ෂ ජෙනරාල් මහාචාර්ය පී.බී. මණ්ඩාවල මහතා සඳහන් කරන්නේ අදාල විනාශයට සම්බන්ධ වූවන්ට එරෙහිව පුරාවිද්‍යා අඥාපනතේ විධි විධානයන්ට යටත්ව උපරිම දඬුවම් හිමිවන බවයි. ඉපැරණි බෞද්ධ උරුමයක් ලෙස හඳුනාගෙන ඇති අදාල දාගැබ පිහිටි ප්‍රදේශය පුරාවස්තු අඥාපනතේ විධිවිධාන අදාලව ඉදිරියේදී පුරාවිද්‍යා දෙපාර්තමේන්තුව බාරයට ගැනිමටත් එම ප්‍රදේශයේ ඉදිරි කැණීම් කටයුතු සහ සංරක්ෂණය කටයුතු සිදුකිරීමටත් බලාපොරොත්තු වන බවද පුරාවිද්‍යා අධ්‍යක්ෂක ජෙනරාල්වරයා වැඩිදුරටත් සඳහන් කළා. ඒ මතුව ඇති තත්වය හා මාධ්‍ය වාර්තා පිලිබඳව අධ්‍යාපන අමාත්‍ය අකිල විරාජ් කාරියවසම් මහතා සිදුකළ විමසීමකට පිළිතුරු දෙමින්.
එහිදි අදහස් දැක්වූ අධ්‍යාපන ආමාත්‍ය අකිල විරාජ් කාරියවසම් මහතා කිසිදු ජාති භේදයකින් තොරව රටේ අභිමානය සහ පෞරාණිකත්වය විදහා දක්වන අතීත උරුමයන් මතු පරපුර වෙනුවෙන් සංරක්ෂණය කිරීම සියලු ශ්‍රී ලාංකීකයන්ගේ වගකීම බව සිහිපත් කළා. දෙලක්ෂ පනස් දහසකට ආසන්න මෙරට පුරාවිද්‍යාත්මක ස්ථාන සංරක්ෂණය කිරීම උදෙසාත්, ඒවායේ ආරක්ෂාව තහවුරු කිරීම සඳහාත් විශේෂ අවධානය යොමු කරන ලෙසද පුරාවිද්‍යා අධ්‍යක්ෂක ජනරාල් මහාචාර්ය පී.බී. මණ්ඩාවල මහතාට මෙහිදි අමාත්‍යවරයා උපදෙස් ලබා දුන්නා. එසේම මේ සම්බන්ධයෙන් ප්‍රායෝගිකව අපහසුතාවයක් මතුවන අවස්ථාවන්හිදී පුද්ගලිකවම හෝ තමා සමඟ සම්බන්ධ වෙමින් අවශ්‍ය කටයුතු යෙදීමට පියවර ගන්නා ලෙසද අධ්‍යාපන අමාත්‍යවරයා පුරාවිද්‍යා අධ්‍යක්ෂක ජනරාල් පී.බී.මණ්ඩාවල මහතාට වැඩිදුරටත් උපදෙස් ලබාදුන්නා
2017 වසරට අදාළ ව පැවැත් වූ අ.පො.ස.(උ/පෙළ) විභාගයේ ප්‍රතිඵල හෙට අලුයම නිකුත් කිරීමට නියමිතයි.
අධ්‍යාපන අමාත්‍ය අකිල විරාජ් කාරියවසම් මහතා විසින් පාසල් මට්ටමේ ප්‍රධාන කඩඉම් විභාග තුනෙහි ම (5 ශ්‍රේණිය ශිෂ්‍යත්ව විභාගය, අ.පො.ස. (සා/පෙළ) විහාගය හා අ.පො.ස.(උ/පෙළ) විභාගයේ) ප්‍රතිඵල සෑම වසරක ම නියමිත දිනයන්හි දී නිකුත් කරන ලෙසට ලබා දී ඇති උපදෙස් අනුව, මෙම ප්‍රතිඵල හෙට දිනයේ නිකුත් කෙරෙනවා.
ඒ අනුව, 5 ශ්‍රේණි ශිෂ්‍යත්ව විභාගයේ ප්‍රතිඵල සෑම වසරක ම ඔක්තෝබර් මස 5 වැනි දිනත්, අ.පො.ස සාමාන්‍ය පෙළ විභාගයේ ප්‍රතිඵල මාර්තු 28 වැනි දිනත්, උසස් පෙළ ප්‍රතිඵල දෙසැම්බර් මස 28 වැනි දිනත් නිකුත් කිරීමට නියමිතයි.
විභාග දෙපාර්තමේන්තුව විසින් මෙවර අ.පො.ස.(උ/පෙළ) විභාග ප්‍රතිඵල දෙසැම්බර් මස 28 වන දින අලුයම නිකුත් කිරීමට පියවර ගෙන ඇත්තේ ඒ අනුවයි. මෙවර අ.පොස. උසස් පෙළ විභාගය සඳහා විභාග මධ්‍යස්ථාන 2230ක දී අයදුම්කරුවන් 315,227 දෙනෙක් ද, විශේෂ අයදුම්කරුවන් 260 දෙනෙක් ද පෙනී සිටියා.
අධ්‍යයන පොදු සහතික පත්‍ර උසස් පෙළ විභාගය සමත් වන සිසුන් විද්‍යා සහ ගණිත අංශවලින් විශ්වවිද්‍යාල අධ්‍යාපනයට යොමු කරවීම සඳහා නව වැඩපිළිවෙළක් සැලසුම් කිරීමට පියවර ගන්නා බව අධ්‍යාපන අමාත්‍ය අකිල විරාජ් කාරියවසම් මහතා පවසනවා. අමාත්‍යවරයා මේ අදහස් පළ කළේ පසුගිය දා (04) අග්‍රාමාත්‍ය රනිල් වික්‍රමසිංහ මහතාගේ ප්‍රධානත්වයෙන් සහ අධ්‍යාපන අමාත්‍ය අකිල විරාජ් කාරියවසම් මහතාගේ සහභාගීත්වයෙන් අරලියගහ මන්දිරයේ දී පැවති පාසල් 3000 ක් සඳහා ජංගම විද්‍යාගාර උපකරණ කට්ටල ලබා දීම පිළිබඳව විදුහල්පතිවරුන් දැනුවත් කිරීමේ වැඩමුළුවකට එක්වෙමින්.
විශ්වවිද්‍යාල අධ්‍යාපනය සඳහා විද්‍යා සහ ගණිත විෂයයන්ට අදාළ පීඨ වෙත ඇතුළත් වන සිසුන්ගේ හිඟයක් පවතින බවට උසස් අධ්‍යාපන අමාත්‍යාංශය මඟින් කළ දැනුවත් කිරීමක් මත මෙම පියවර ගැනීමට තීරණය කළ බවත් එම වැඩපිළිවෙළ මේ වන විට සැකසෙමින් පවතින බවත් අමාත්‍යවරයා මෙහිදී කියා සිටියා.
පාසල් ක්‍රිකට් ජාතික තුන් අවුරුදු සැලැස්ම එළදැක්වීමේ උත්සවය හෙට පෙරවරු 9.30 ට අධ්‍යාපන අමාත්‍ය අකිල විරාජ් කාරියවසම් මහතාගේ ප්‍රධානත්වයෙන් කොළඹ බණ්ඩාරනායක සම්මන්ත්‍රණ ශාලාවේ දී පැවැත්වීමට නියමිතයි.
පාසල් තුළ ක්‍රිකට් ක්‍රීඩාව දියුණු කරමින්, පාසල් සිසු දරුවන් වෙත ජාතික මෙන්ම ජාත්‍යන්තර මට්ටමෙන් ක්‍රිකට් ක්‍රිඩාව ජයගැනීමට අවශ්‍ය ශක්තිය සහ දැනුම ලබා දීම පාසල් ක්‍රිකට් ජාතික මෙහෙයුම් තුන් අවුරුදු සැලැස්මේ අරමුණයි.
අධ්‍යාපන අමාත්‍යාංශය මඟින් සංවිධාන කරනු ලබන මෙම වැඩසටහන සඳහා සිදත් වෙත්තමුණි, රොෂාන් මහානාම, මහේල ජයවර්ධන සහ මුත්තයියා මුරලිදරන් ඇතුළු ශ්‍රී ලංකාවේ ප්‍රවීණ ක්‍රිකට් ක්‍රීඩකයින් රැසක් සහභාගී වීමට නියමිතයි.
රට පුරා දිනෙන් දින පැතිර යන ඩෙංගු රෝග තත්වයන්ගෙන් පාසල් දරුවන් ආරක්ෂා කරගැනීම සඳහා අධ්‍යාපන අමාත්‍ය අකිල විරාජ් කාරියවසම් මහතාගේ උපදෙස් පරිදි අධ්‍යාපන අමාත්‍යාංශය ඩෙංගු මර්දන වැඩසටහන් රැසක් ක්‍රියාත්මක කර තිබෙනවා.
ඊට සමගාමී ව, 2018 වසරේ පළමු පාසල් වාරය ආරම්භ වීමට පෙර, එනම්, 2017 දෙසැම්බර් 30,31 දෙදින තුළ ද දීපව්‍යාප්ත සියලු පාසල්වල විශේෂ ඩෙංගු මර්දන වැඩසටහනක් ක්‍රියාවට නැංවීමට නියමිතයි.
ජාතික ඩෙංගු මර්දන වැඩසටහනට සමගාමී ව, සියලු පාසල් ඩෙංගුවලින් තොර කලාප බවට පත්කිරීම වෙනුවෙන් ක්‍රියාත්මක වන මෙම වැඩසටහන සාර්ථක කරගැනීම සඳහා කලාප අධ්‍යාපන අධ්‍යක්ෂවරුන්, කොට්ඨාස අධ්‍යාපන අධ්‍යක්ෂවරුන්, විදුහල්පතිවරුන්, ගුරු උපදේශකවරුන්, ගුරුභවතුන් හා අදාළ අනෙකුත් නිලධාරීන්ගේ සක්‍රීය සහභාගීත්වය ලබාදිය යුතු බවත්, කලාප මට්ටමින් ඒ පිළිබඳ අධීක්ෂණ වාර්තාවක් අධ්‍යාපන අමාත්‍යාංශය වෙත යොමු කළ යුතු බව ද අධ්‍යාපන ලේකම්වරයා අවධාරණය කරනවා.
එමෙන් ම පාසල් පරිශ්‍රයන් පිරිසිදු කිරීමට දෙමව්පියන්, ත්‍රිවිධ හමුදාව, පොලිසිය, සිවිල් ආරක්ෂක බළකාය හා ප්‍රාදේශීය සෞඛ්‍ය වෛද්‍ය නිලධාරීන්ගේ ශ්‍රම දායකත්වය ලබාගැනීමට කටයුතු කළ යුතු බව ටද අධ්‍යාපන ලේකම් සුනිල් හෙට්ටිආරච්චි මහතා විසින් මේ වනවිටත් සියලු පාසල් ප්‍රධානීන් දැනුවත් කර තිබෙනවා. මීට අමතර ව සතියේ සෑම ඉරිදා දිනක ම පාසල් පරිශ්‍රයන් පවිත්‍ර කිරීමේ කටයුතු අඛණ්ඩ ව පවත්වාගෙන යාම වෙනුවෙන් පාසල් ප්‍රධානීන් පියවරගත යුතු බවට ද අධ්‍යාපන ලේකම්වරයා විසින් මේ සම්බන්ධ ව නිකුත් කර ඇති චක්‍රලේඛය මඟින් දැනුවත් කර තිබෙනවා.
එමෙන් ම, කිසියම් පාසල් පරිශ්‍රයකට ඩෙංගු මදුරුවන් බෝවීම යටතේ නීත්‍යානුකූල ව යම් දඩමුදලක් නියම කළහොත් ඒ සඳහා පාසල් ප්‍රධානීන් වගකිව යුතු බව ද අධ්‍යාපන ලේකම්වරයාගේ චක්‍රලේඛයේ සඳහන්.
අධ්‍යාපනයේ ගුණාත්මකභාවය සාක්ෂාත් කිරීම වෙනුවෙන් සක්‍රීය ව දායක විය හැකි, නූතන තාක්ෂණික අභියෝගවලට සාර්ථක ව මුහුණ දීමට සමත් විශිෂ්ට ගුරුපරපුරක් නිර්මාණය කිරීම වෙනුවෙන් ඩිජිටල් ඉගෙනුම් තාක්ෂණය පාසල් අධ්‍යාපන පද්ධතිය සමඟ ඒකාබද්ධ කිරීම කෙරෙහි අධ්‍යාපන අමාත්‍ය අකිල විරාජ් කාරියවසම් මහතාගේ විශේෂ අවධානය යොමු වී තිබෙනවා.
2017 වසරේ 5 ශ්‍රේණි ශිෂ්‍යත්ව විභාගයේ ලකුණු මට්ටම අනුව, 2018 වසරේ 6 ශ්‍රේණියට සිසුන් ඇතුළත් කිරීම සඳහා පාසල් ඉල්ලුම් කිරීමට අදාළ ව අභියාචනා භාරගැනීම 2018-01-15 දින සිට 2018-02-15 දක්වා සිදුකරනු ලැබේ.
අදාළ ඉල්ලුම් පත්‍ර අධ්‍යාපන අමාත්‍යාංශයේ www.moe.gov.lk වෙබ් අඩවියෙන් ලබාගත හැකි අතර, විධිමත් ව සම්පූර්ණ කරන ලද අභියාචනා අයදුම්පත් ලියාපදිංචි තැපෑලෙන් අධ්‍යාපන අධ්‍යක්ෂ, පාසල් කටයුතු ශාඛාව, අධ්‍යාපන අමාත්‍යාංශය, ඉසුරුපාය, පැලවත්ත, බත්තරමුල්ල යන ලිපිනයට එවීමට කටයුතු කළ යුතුය.
සාමය සහ සමාජ යහසාධනයේ සුබ පණිවුඩය ලොවට රැගෙන ආ ජේසුස් ක්‍රිස්තුස් වහන්සේගේ උපත සිහිපත් කරමින් සමස්ත ලෝකවාසී කිතුනු බැතිමතුන් නත්තල් උත්සවය අති උත්කර්ෂවත්ව සමරන මේ මොහොතේ ඔවුන් සියලු දෙනාට අධ්‍යාපන අමාත්‍යවරයා වශයෙන් මගේ සුබපැතුම් එක්කරමි.
ආගමික සහජීවනය, පරිත්‍යාගශීලීභාවය, දයාව වැනි හර සංකල්ප සමාජගත කරන්නට අධ්‍යාපන පද්ධතියට අතිවිශාල ශක්තියක් පවතියි. සමාජ සංවේදී දරුවන් නිර්මාණය කරන්නට ඉගෙනුම් - ඉගැන්වීම් ක්‍රියාවලිය තුළ සුවිශේෂ අවධානය යොමු කරනුයේ ද එබැවිනි. ජාති ආගම් භේදයකින් තොර ව රටක් වශයෙන් එකාවන් ව කටයුතු කිරීමට නම්, විවිධත්වයට ගරුකරන, විවිධත්වය අගයන, සංස්කෘතික අනන්‍යතාවන් හඳුනන මිනිසුන් සමාජයට නිර්මාණය කළ යුතුය. එහි ලා අධ්‍යාපනයට පැවරෙන කාර්යභාරය අතිමහත් ය. මේ වනවිටත් අධ්‍යාපන පද්ධතිය තුළ ක්‍රියාවට නංවා ඇති විවිධ වැඩසටහන් හරහා දරුවන්ගේ විෂය දැනුම මෙන් ම සමාජ සංවේදීබව ඉහළ නංවන්නට අපගේ සුවිශේෂ අවධානය යොමුව ඇත්තේ ද එබැවිනි.
වෛරය, ක්‍රෝධය, ද්වේශය වෙනුවට ප්‍රේමය, දයාව, කරුණාව සමාජගත කරන්නට ජේසුස් වහන්සේ කළ මඟපෙන්වීම මුලුමහත් මිනිස් ප්‍රජාවට ම ආදර්ශයකි. ජාතිය කවරක් වුවත්, ආගම කවරක් වුවත්, සමාජ යහපත වෙනුවෙන් එක්සිත්ව කටයුතු කරන්නට අවශ්‍ය මාවත සියලු ආගමික ශාස්තෘවරුන් විසින් පෙන්වා දී තිබේ. ඒ මඟ අනුව යමින්, ඊට ශක්තිය එකතු කරමින් නත්තලේ සැබෑ අරුත සාක්ෂාත් කරගන්නට සාමූහික ව පෙළගැසෙමු.
ඔබ සැමට සුබ නත්තලක් වේවා!...
අකිල විරාජ් කාරියවසම්
අධ්‍යාපන අමාත්‍ය
_medium.jpg)
ජය පරාජයන් සමව විද දරා ගනිමින් සාර්ථක පුරවැසියෙකු බවට පත් වී රට වෙනුවෙන් තම වගකීම් ඉටු කිරීමට කැපවීම සියලු දරුවන්ගේ වගකීම බව අධ්‍යාපන අමාත්‍ය අකිල විරාජ් කාරියවසම් මහතා පවසනවා. මෙවර අධ්‍යයන පොදු සහතික පත්‍ර උසස් පෙළ විභාගය සඳහා ඉදිරිපත් වී ඉහළ ප්‍රතිඵල ලැබූ දරුවන්ගේ දක්ෂතා අගයන අධ්‍යාපන අමාත්‍ය අකිල විරාජ් කාරියවසම් මහතා ඉදිරි උසස් අධ්‍යාපන කටයුතු වල දී ද එම දක්ෂතාවන් සහ උනන්දුව පවත්වා ගනිමින් විශිෂ්ටයින් බවට පත්වන්නට අදිටන් කරගත යුතු බව ද සිහිපත් කලා. රජයක් ලෙස දරුවන්ගේ අධ්‍යාපන උන්නතිය වෙනුවෙන් ගත හැකි සෑම පියවරක්ම ගැනීමට තමන් අධ්‍යාපන අමාත්‍යවරයා ලෙස කැපවෙන බවත් එහි උපරිම ඵල නෙළා ගැනීමේ වගකීම දරුවන් සතු බවත් සඳහන් කළා.
පාසල් අධ්‍යාපන පද්ධතියේ භෞතික හා මානව සම්පත් සංවර්ධනය සඳහා දියත් කොට ඇති ළගම පාසල හොඳම පාසල වැනි වැඩසටහන් මගින් නාගරික ජනප්‍රිය පාසල් වෙනුවට ග්‍රාමීය පාසල් සංවර්ධනය සඳහා රජය මේ වන විට පියවර ගෙන ඇති බව සිහිපත් කළ අමාත්‍යවරයා මෙවර උසස් පෙළ විභාගයේ මෙන්ම පසුගිය කාලයේ පැවැති පාසල් කඩඉම් විභාග වලදී ඉහළ ප්‍රතිඵල ලැබූවන් බොහෝ දෙනෙකු අගනුවර ජනප්‍රිය පාසල්වලින් නොව ඉන් බැහැර පාසල්වලින් බිහිවී තිබීම පිළිබඳව ද තමා සතුටට පත්වන බව ද සඳහන් කළා. මේ හරහා අධ්‍යාපනයේ සම අයිතීන් විෂමතාවකින් තොර ව දරුවන් අතට පත් කිරීමේ රජයේ වෑයමෙහි සාර්ථකත්වයක් පිළිබිඹු කරන බව ද අමාත්‍යවරයා පැවසුවා.
මෙවර උසස් පෙළ විභාගයේ විශිෂ්ට සාමාර්ථයන් ලබාගත් දරුවන් සේම ඉහළ ප්‍රතිඵල අත්කර ගැනීමට අපොහොසත් වූ දරුවන් සම්බන්ධයෙන් ද අදහස් පලකළ අධ්‍යාපන අමාත්‍යවරයා, ජයග්‍රහණයන් සාර්ථක ජයග්‍රහණයන් බවට පත්වන්නේ පරාජයන්ට මුහුණ දීමෙන් ලබා ගන්නා පන්නරයෙන් බව ද පෙන්වා දුන්නා. එමෙන් ම ලෝකය තම දැනුමෙන් සහ හැකියාවන්ගෙන් දිග්විජය කළ ඇල්බට් අයින්ස්ටයින්, තෝමස් අල්වා එඩිසන්, සුචිරෝ හොණ්ඩා වැනි පුද්ගලයන් රැසක් පරාජයන් හමුවේ නොසැලි ජීවිතය ජයගත් ආකාරය ආදර්ශ කර ගැනීමේ වැදගත්කම ද සිහිපත් කළා.
අවශ්‍ය වන්නේ නිවැරදි අවබෝධයෙන් යුක්තව යහපත් පුරවැසියෙකු ලෙස නිවැරදි දේ සිදුකරමින් ජිවිතය ජයගත හැකි අදිටනින් යුතු ව කටයුතු කිරීම බව ද පැවසූ අධ්‍යාපන අමාත්‍ය අකිල විරාජ් කාරියවසම් මහතා අධ්‍යයන පොදු සහතික පත්‍ර උසස් පෙළ විභාගයේ ප්‍රතිඵල ලැබූ සියලු දරුවන්ගේ ඉදිරි අධ්‍යාපන කටයුතු සඳහා මෙන්ම සාර්ථක අනාගතයක් සඳහා ද සුභ පැතුම් එක් කළා.
මෙවර අ.පො.ස සාමාන්‍ය පෙළ විභාගයේ ගණිත ප්‍රශ්න පත්‍රයට පිළිතුරු ලිවීමේ දී සිසුන්ට දුෂ්කරතා මතු වූ බව පවසමින් ඇතැම් දේශපාලනඥයින් සහ වෘත්තීය සමිති නියෝජිතයන් ගෙන ගිය ප්‍රකාශ සම්බන්ධයෙන් විභාග කොමසාරිස් ජනරාල් සනත් පූජිත මහතා පිළිතුරු ලබාදී තිබෙනවා.
මතු වූ තත්වය පිළිබඳ අධ්‍යාපන අමාත්‍ය අකිල විරාජ් කාරියවසම් මහතා විසින් සිදුකළ කරුණු විමසීමකට අදාළ ව, විභාග කොමසාරිස් ජනරාල්වරයා විසින් ලබාදුන් පිළිතුරෙහි සංක්ෂිප්තය පහත දක්වා ඇත.
------------------------------
අධ්‍යයන පොදු සහතික පත්‍ර (සාමාන්‍ය පෙළ) විභාගය
2017 දෙසැම්බර් මස 27 වැනිදා ගණිතය ප්‍රශ්න පත්‍රයේ ගැටළුවට විසඳුමක් ලබාදීම
මෙවර අ.පො.ස සා පෙළ විභාගයේ ගණිත ප්‍රශ්න පත්‍රයට පිළිතුරු ලිවීමේ දී සිසුන්ට දුෂ්කරතා මතු වූ බවක් ඇතැම් මාධ්‍යවලින් අනාවරණය කර තිබුණි. මෙම තත්වය යටතේ සිසුන්ට සාධාරණයක් ඉටු කිරීමේ අපේක්ෂාවෙන් මේ පිළිබඳ අදාළ ප්‍රශ්න පත්‍ර සැකසුම් මණ්ඩලය සමඟ ප්‍රධාන පරීක්ෂකවරුන් සහ පාසල්වල ගණිතය විෂයය උගන්වනු ලබන ගුරුවරුන් ඇතුළු ව 20ක් පමණ වූ කණ්ඩායමක් සමඟ සමාලෝචනයක් කරන ලදී.
විභාගයක් අවසානයේ දී සිදුකරනු ලබන පාලක උත්තර පත්‍ර ලකුණු කිරීමේ වැඩසටහන යටතේ මෙවැන්නක් සෑම විෂයයක් සඳහා ම යොදාගනු ලැබේ. මෙහි දී උත්තර පත්‍ර සාම්පලයක් පරීක්ෂා කිරීම ද සිදුවේ. ඒ අනුව ගණිතය විෂයය සඳහා වැඩි උත්තර පත්‍ර සංඛ්‍යාවක්, සාම්පලයක් ලෙස ලබාගෙන පරීක්ෂාවට ලක්කරන ලදී. මෙහි දී අනාවරණය වූයේ මෙම ප්‍රශ්න පත්‍රයේ අපේක්ෂකයන්ට සමත් ලකුණු ලබාගැනීමට දුෂ්කර වී ඇතැයි නිගමනය නොවන බවයි.
එහෙත් ප්‍රශ්න කිහිපයක අවසාන කොටස් පමණක්, හේතු දැක්වීම සහ ගැටළු විසඳීම වැනි ඉහළ මට්ටමේ කුසලතා පාදක කොට සකස් වී ඇති බැවින් ඇතැම් සිසුන්ට එම ප්‍රශ්නවලට සම්පූර්ණ ලකුණු ලබාගැනීම තරමක් දුෂ්කර වීමට ඉඩ ඇති නමුත්, ඉහත තත්වය යටතේ ලකුණු දීමේ පටිපාටියේ අවශ්‍ය සංශෝධන සිදුකර සිසුන්ට අසාධාරණයක් නොවන පරිදි උත්තර පත්‍ර ඇගයීම් ක්‍රියාවලිය සිදුකිරීමට පියවර ගෙන ඇත.
බී සනත් පූජිත
විභාග කොමසාරිස් ජනරාල්
· ජංගම දුරකථන භාවිතා කරමින් විභාග වංචා කළ අපේක්ෂකයකුගේ විභාග අපේක්ෂකත්වය පරීක්ෂණ වාර්තාව අනුව අත්හිටුවයි
· තවත් අපේක්ෂකයකු සම්බන්ධ විමර්ශනයක්
විභාග නීති රීති නිසියාකාරව පිළිපදිමින් විභාගයට පෙනී සිටින අයදුම්කරුවන්ට සාධාරණය ඉටු කිරීම සඳහා විභාග නීති කඩකරන පුද්ගලයින්ට එරෙහිව නීතිය දැඩිව ක්‍රියාත්මක කරන ලෙස අධ්‍යාපන අමාත්‍ය අකිල විරාජ් කාරියවසම් මහතා විභාග කොමසාරිස් ජනරාල්වරයාට හා පොලීසියට උපදෙස් ලබා දී තිබෙනවා. ඒ අනුව විභාග වංචාකරුවන්ට එරෙහිව විභාග නීතියට අමතරව අපරාධ පරීක්ෂණ දෙපාර්තමේන්තුව මගින්ද පරීක්ෂණ සිදු කර නීතිය ක්‍රියාත්මක කෙරෙනු ඇති.
පසුගිය දා අනුරාධපුර වලිසිංහ හරිස්චන්ද්‍ර විදුහලේ සිසුවකු විසින් ජංගම දුරකථන භාවිතා කරමින් සිදු කළ විභාග වංචාව පිළිබඳ පළාත් අධ්‍යාපන අධ්‍යක්ෂවරිය විසින් සිදු කළ පරීක්ෂණ වාර්තාව අනුව එම සිද්ධියේ සැකකාර සිසුවාගේ මෙවර විභාග අපේක්ෂකත්වය සම්පූර්ණයෙන් අත්හිටුවා තිබෙනවා. එසේම එම සිසුවා සම්බන්ධව පළාත් අධ්‍යාපන අධ්‍යක්ෂවරිය ඉදිරිපත් කළ පැමිණිල්ලක් අනුව අනුරාධපුර පොලීසිය මගින් වැඩිදුරටත් විමර්ශන කටයුතු පැවැත්වෙනවා.
ඉසිපතන විදුහලේ විභාග මධ්‍යස්ථානයේ දී පුද්ගලික අයදුම්කරුවකු විසින් ජංගම දුරකථන භාවිතා කරමින් සිදුකළ විභාග වංචාවක් පිළිබඳ ලැබුණු තොරතුරක් අනුව නියෝජ්‍ය විභාග කොමසාරිස්වරයකු විසින් අදාළ මූලික පරීක්ෂණ කටයුතු සිදු කරන අතර මෙම පරීක්ෂණයට අමතරව ඉදිරි කටයුතු සඳහා නාරාහේන්පිට පොලීසියට ද පැමිණිලි කර තිබෙනවා.