පාසලක ඉගෙනුම ලබන එක් සිසුවෙකුට අවම වශයෙන් කියවීම සඳහා පොත් 10 ක් පැවතිය යුතුය යන්න ජාත්‍යන්තර නිර්ණායකය යි. ඒ සඳහා ඉදිරි වසර 5 තුළ පාසල් පුස්තකාල තුළ භාවිත පොත් සංඛ්‍යාව 50% කින් ඉහළ නැංවීමට විශේෂ වැඩපිළිවෙලක් සකස් කිරීමට අධ්‍යාපන අමාත්‍ය අකිල විරාජ් කාරියවසම් මහතා අදාළ නිලධාරීන්ට උපදෙස් ලබා දී තිබේ. එහි එක් පියවරක් ලෙස “ළඟම පාසල හොඳම පාසල” ව්‍යාපෘතිය යටතේ පාසල් 3200 ක් වෙත පුස්තකාල පොත් ලබාදීම සඳහා රුපියල් මිලියන 700 ක් ප්‍රදානය කිරීමේ වැඩපිළිවෙලක් මේ වන විට ක්‍රියාත්මක කර ඇත.
මෙලෙස පාසල් පුස්තකාල සඳහා ලබාගන්නා සියලුම පොත් අධ්‍යාපන ග්‍රන්ථ ප්‍රකාශන උපදේශක මණ්ඩලයේ අනුමැතිය ලබා තිබිය යුතු වන බැවින් කිසියම් ප්‍රකාශකයෙකු හෝ කර්තෘ ප්‍රකාශකයෙකු පාසල් පුස්තකාල සඳහා පොත් ලබා දීමට අපේක්ෂා කරන්නේ නම්, නොපමාව ස්වකීය කෘති හෝ කෘතියට අධ්‍යාපන ග්‍රන්ථ ප්‍රකාශන උපදේශක මණ්ඩලයේ අනුමැතිය ලබා ගැනීම සඳහා ඉදිරිපත් කිරීමට කටයුතු කළ යුතුයි. අනුමැතිය ලබාදී අදාළ බලපත්‍රය කඩිනමින් නිකුත් කිරීම සඳහා නිශ්චිත ක්‍රමවේදයක් මේ වන විට සකස්කර ඇති අතර අධ්‍යාපන අමාත්‍යවරයා උපදෙස් ලබා දී ඇති පරිදි රාජ්‍ය සාහිත්‍ය සම්මාන ලැබූ සහ ඒ සඳහා නිර්දේශිත කෘති සඳහා මෙම බලපත්‍රය ලබා ගැනීම අවශ්‍ය නොවේ.
“ළඟම පාසල හොඳම පාසල” ව්‍යාපෘතිය යටතේ ලබා දෙන ප්‍රතිපාදන අනුව පාසල් පුස්තකාල සඳහා පොත් තෝරා ගැනීමේ දී පිළිපැදිය යුතු උපදෙස් සහ සැලකිල්ලට ගත යුතු නිර්ණායක සම්බන්ධව විදුහල්පතිවරුන් දැනුවත් කිරීම සඳහා ද මේ වන විට කටයුතු යොදා ඇති අතර, පාසලට ආසන්නතම පොත් වෙළඳසැලකින් පොත් මිල දී ගත හැකි ක්‍රමවේදයක් හඳුන්වා දීමට ද පියවර ගෙන ඇත.
