නවතම පුවත්

විනාශ වී ගිය ආර්ථිකයක්, පිරිහී ගිය සදාචාරයක් සහිත රටක් භාරගනිමින් ගත වූ වසර කිහිපය තුළ උපරිම වේගයෙන් වැඩ කළ බවත්, ඒ නිසා මෙම ජනාධිපතිවරණ සටන නිසැකව ම ජයගන්නා බවත් එක්සත් ජාතික පක්ෂ මහලේකම්, අධ්‍යාපන අමාත්‍ය, නීතිඥ අකිල විරාජ් කාරියවසම් මහතා ප්‍රකාශ කළේය. මහලේකම්වරයා මේ අදහස් පළ කළේ  ජනාධිපති අපේක්ෂක සජිත් ප්‍රේමදාස මහතාගේ ජය තහවුරු කිරීම වෙනුවෙන් අද (12) කුලියාපිටියේ පැවති අවසන් ජනහමුවට එක්වෙමිනි.

මෙහි දී වැඩිදුරටත් අදහස් පළ කළ අමාත්‍යවරයා, “අවුරුදු තුනහමාරක් තිස්සේ හොඳම අමාත්‍යාංශ ටික ශ්‍රී ලංකා නිදහස් පක්ෂයට දීලා, පළාත් සභා පවා නැතුව, රාජපක්ෂලා ඉවරකරල ගියපු භාණ්ඩාගාරය, විනාශ කරල ගිය ආණ්ඩුව, ඔවුන් විනාශ කරලා ගිය  සදාචාරය, මේ රටේ ආර්ථිකය, මේ රටේ ජාත්‍යන්තර ව අපට තිබුණු කීර්තිය, මේ හැම දෙයක්ම නැති කරල ගිය රටක් භාර අරගෙන අපි කරපු හරිය මදිද කියල මම තමුන්නාසෙලගෙන් අහන්න කැමතියි. තමුන්නාසෙලා දන්නවා..අපි හොදට කැප වෙලා වැඩ කළා. අපට යන්න පුළුවන් උපරිම වේගයෙන් අපි වැඩ කළා...” යැයි පැවසීය.

පක්ෂයක් වශයෙන් සාමූහික ව මුල සිට ම කටයුතු කළ බවත්, ඒ නිසා මෙවර එක්සත් ජාතික පක්ෂයට විජයග්‍රහණය නියත වශයෙන් ම හිමි වන බවත් ප්‍රකාශ කළ අමාත්‍යවරයා,

ගොඩක් අය බලාගෙන හිටියා එක්සත් ජාතික පක්ෂය කැඩෙයි, විවිධ කොටස්වලට භේද වෙයි කියලා. නමුත් අපිට පුළුවන්කම ලැබුණා ගරු සජිත් ප්‍රේමදාස මැතිතුමත් ගරු අගමැති රනිල් වික්‍රමසිංහ මැතිතුමන් ඇතුළු අපේ නායකයො හැම කෙනෙක් ම එක දරමිටක් වගේ එකමුතු වෙලා මේ ජනාධිපතිවරණ සටනට එන්න අපට පුළුවන් වුණා. මම ආඩම්බර වෙනවා මේ යුගයේ පක්ෂයේ මහලේකම් හැටියට  මේ සටන මෙහෙයවන්න අපේ උපරිම කැපවීම ලබා දෙන්න හැකිවීම ගැන. අද මේ කුලියාපිටියට ආව ජන ගංගාවෙන් ම පේනවා මේ සටන අපි දිනනවා කියලා. ”යැයි ද සඳහන් කළේය.

අධ්‍යාපන අමාත්‍යාංශයේ විෂය භාර අමාත්‍යවරයා වශයෙන් රටේ දරුවන් වෙනුවෙන් සුරක්ෂා රක්ෂණය හඳුන්වා දුන් බව ද, ළගම පාසල හොදම පාසල වැඩසටහන යටතේ රටපුරා පාසල් ගොඩනැගිලි අතිවිශාල ප්‍රමාණයක් ඉදිකර දුන් බව ද, 13 වසරක අධ්‍යාපන වැඩසටහන හදුන්වා දෙමින් සාමාන්‍ය පෙළ අසමත් දරුවන්ට ද වෘත්තීය විෂයන් ඔස්සේ අනාගතය ශක්තිමත් කරගන්නට අවස්ථාව සලසා දුන් බව ද, රටේ අධ්‍යාපන ක්ෂේත්‍රය නගාසිටුවීම වෙනුවෙන් උපරිමයෙන් ම කටයුතු කළ බව ද තවදුරටත් කරුණු දක්වමින් අමාත්‍යවරයා කියා සිටියේය. මේ අවස්ථාවට ගරු අග්‍රාමාත්‍ය රනිල් වික්‍රමසිංහ මැතිතුමන් ඇතුළු පක්ෂයේ මැති ඇමතිවරුන් රැසක් එක්වූහ.

ජනාධිපති අපේක්ෂක ගෝඨාභය රාජපක්ෂ මහතාගේ ප්‍රතිපත්ති ප්‍රකාශනයෙහි සඳහන් පාසල් පදනම් වූ නව විද්‍යාත්මක Z-score ක්‍රමවේදයෙන් විශ්ව විද්‍යාල සඳහා සිසුන් ඇතුළත් කිරීමට අවස්ථාව ලබා දුනහොත් දේශපාලන බලපෑම් පවා ඇතිකළ හැකි බව අධ්‍යාපන අමාත්‍ය, නිතිඥ අකිල විරාජ් කාරියවසම් මහතා ප්‍රකාශ කරයි.

අමාත්‍යවරයා එසේ ප්‍රකාශ කළේ, අධ්‍යාපන අමාත්‍යාංශයේ අද ( 07) දහවල් පැවැති විශේෂ මාධ්‍ය සාකාච්ඡාවේදී ය.

“ දිස්ත්‍රික්ක පදනමින් විශ්ව විද්‍යාලවලට සිසුන් තෝරා ගැනිමේ දී එක් දිස්ත්‍රික්කයක ප්‍රධාන හා  ජනප්‍රිය පාසලට සමාන්තරව දුෂ්කර පාසල්වල සිසුන්ට ඇතිවන අසාධාරණය ඉවත් කිරීම සඳහා පාසල් පදනම් කරගෙන  නව විද්‍යාත්මක ක්‍රමවේදයක් හඳුන්වා දිම ද කළ යුත්තේ? එසේ නැත්නම් දුෂ්කර පාසල් ක්‍රමය නැතිකර ඒවා දියුණු පාසල් මට්ටමට ගෙනඒම දැයි මෙරට ජනතාවගෙත් මා අහන්න කැමතියි. දුෂ්කර පාසල් හැමදාම ඒ තත්ත්වයෙන් ම තබා ගැනීමට මේ ගොල්ලෝ කැමති බවයි, පෙනි යන්නේ ”

ජනාධිපති අපේක්ෂක ගෝඨාභය රාජපක්ෂ මහතාගේ ප්‍රතිපත්ති ප්‍රකාශනයෙහි අධ්‍යාපනය පිළිබඳ සදහන් වී ඇති කරුණු දෙස බැලූ විට පුදුම හිතෙන බවත් අධ්‍යාපනඥයින් හෝ අධ්‍යාපන ක්ෂේත්‍රය හා සම්බන්ධ සාමාන්‍ය දැනුමක් ඇති කෙනෙකුට වුවත් එහි ඇති බරපතලකම හා ගැටලු සහගත බව හඳුනා‍ගත හැකි නිසා එවැනි කරුණු ප්‍රතිපත්ති ප්‍රකාශනයට ඇතුළත් කරන්නේ නැති බවත් අමාත්‍යවරයා ප්‍රකාශ කළේය.

“ මේ ප්‍රකාශනය හදන විට අධ්‍යාපනඥයෝ  නම් ළඟින්වත් ඉදලා නැහැ” යි ද අමාත්‍යවරයා අවධාරණය කළේය.

පාසල් පදනම් කරගත් නව විද්‍යාත්මක ක්‍රමයක් ඔස්සේ දුෂ්කර පාසල් ශිෂ්‍යයන්ට විශ්ව විද්‍යාල සඳහා ඇතුළත් වීමේ ක්‍රමවේදයක් සකස් කිරීම සම්බන්ධයෙන් එම මැතිවරණ ප්‍රකාශනයෙහි සඳහන් යෝජනා පිළිබඳ ව වැඩි දුරටත් කරුණු දැක් වු අමාත්‍යවරයා එවැනි නව විද්‍යාත්මක ක්‍රමයක් ඔස්සේ විශ්ව විද්‍යාල වලට සිසුන් ඇතුළත් කර ගැනිමට යාමේ බරපතලකම ගැන පෙන්වා දෙමින් එවැනි ක්‍රමවේදයක් ක්‍රියාත්මක කර විශ්ව විද්‍යාල ප්‍රවේශය සිසුන්ට ලබා දුනහොත්, දේශපාලන බලපෑම් පවා ඇති කිරීමට පිළිවන්බව ද වැඩිදුරටත් පැවසීය.

“මේ ගොල්ලන්ට බලයට එන්න බැරිවෙන නිසා හොඳයි, නැත්නම් බලයට ආවොත් අප මේ හදාගෙන යන අධ්‍යාපන පද්ධතිය කඩා වැටෙනවා” යැයි ද  අමාත්‍යවරයා පැවසීය.

දුෂ්කර පාසල් වෙනුවට සියලු පාසල් වලට සමානව භෞතික හා මානව සම්පත් ලබා දී දියුණු පාසල් පද්ධතියක් ඇති කිරීම වත්මන් ආණ්ඩුවේ වැඩපිළිවෙල වුව ද පොදුජන පෙරමුණේ ප්‍රතිපත්ති ප්‍රකාශය අනුව පෙනී යන්නේ දුෂ්කර පාසල් ක්‍රමය තවදුරටත් පවත්වාගෙනයාම ඔවුන්ගේ අරමුණ වී තිබෙන බව යැයි ද අමාත්‍යවරයා සඳහන් කළේය.

අධ්‍යාපනඥයන් ප්‍රමුඛ විද්වත් පිරිසකගේ නායකත්වයෙන් නිර්ණායක සකස් කොට වසර ගණනාවක් පුරා ක්‍රියාත්මක කරන ලද Z-score ඉතා හොඳ විද්‍යාත්මක ක්‍රමයක් බවත් විපක්ෂයේ සිටිය දී පවා ඒ සම්බන්ධයෙන් කරුණු දක්වන ලද බවත් පැවසූ අමාත්‍යවරයා පාසල් පදනම් කර ගනිමින් Z-score ක්‍රමයක් සකස් කිරීම සඳහා දුෂ්කර පාසල් උදෙසා නිර්ණායක සකස් කරන්නේ කෙසේ දැයි ප්‍රශ්න කළේය.

අග්‍රාමාත්‍ය රනිල් වික්‍රමසිංහ මැතිතුමා එදා අධ්‍යාපන අමාත්‍යවරයාව සිටිය දී විද්‍යාත්මක පුහුණවක් ලබා දී ගුරුවරුන් ගුරු වෘත්තිකයන් ලෙස පාසල් පද්ධතියට ඇතුළත් කිරීම පිණිස අධ්‍යාපන විද්‍යාපීඨ ආරම්භ කරන ලද බව පෙන්වා දුන් අමාත්‍යවරයා,  අධ්‍යාපන විද්‍යා පීඨ, විශ්ව විද්‍යාල පීඨ බවට පත්කර උපාධියක් ලබා දුන් පමණින් ගුරු වෘත්තීය සම්බන්ධ ප්‍රශ්නය නොවිස‍ඳෙන බවත් විද්‍යා පීඨ ඔස්සේ ගුරු පුහුණුව මෙන් ම ඔවුනට උපාධි ලබා ගැනීම සඳහා ද අවස්ථාව අවුරා නැති බවින් විද්‍යා පිඨ විශ්ව විද්‍යාල පීඨ බවට පත්කිරීමේ යෝජනාව පුදුම සහගත බවත් සඳහන් කළේය.

ගුරු සහායක සහයිකාවන් 50,000ක් බඳවා ගැනීම සඳහා  ජනාධිපති අපේක්ෂක ගෝඨාභය රාජපක්ෂ මහතා ඉදිරිපත් කර ඇති යෝජනාව ගැන ද අමාත්‍යවරයා  සඳහන් ක‍ළේ, පසුගිය රාජපක්ෂ ආණ්ඩුව ගුරු සහායකයින් බඳවාගෙන අධ්‍යාපන පද්ධතියේ ගුණාත්මකභාවය අඩුකරන ලද බවයි.

අධ්‍යාපන පද්ධතියේ ගුණාත්මක බව ආරක්ෂා කරගැනීම සඳහා 2015 වසරට පෙර සිදුකරන ලද ආකාරයට දේශපාලන ලයිස්තුවෙන් වැඩ බලන විදුහල්පතිවරුන් පත්කිරීම වැනි  ක්‍රම වෙනුවට, විභාග පවත්වා සුදුස්සන් බඳවා ගැනීම තමා අධ්‍යාපන පදවියට පත් වු පසු ක්‍රියාත්මක කළ බවත් අමාත්‍යවරයා පැවසීය.

“ බස් ඩිපෝ වලට විවිධ කාර්මිකයන් 50,000ක් බඳවා ගන්නා ආකාරයට පාසල් සඳහා ගුරුවරුන් 50,000ක් බඳවා ගත නොහැකියි. ගුරුවරුන් බඳවා ගැනිමට විධිමත් ක්‍රමයක් තිබෙනවා. එම ක්‍රමයෙන් තොරව ගුරුවරුන් බඳවා ගත නොහැකියි.  වැරදිමකින් හෝ එම කණ්ඩායම බලයට පත්වුවහොත් අධ්‍යාපනය වෙනුවෙන් මේ දක්වා අප සිදුකරන ලද දේ ගඟට කැපූ ඉණි බවට පත්වෙනවා. මේ කියන විදිහට කටයුතු කළහොත් වසර 13ක  සහතික කරන ලද අධ්‍යාපනය ද අහෝසි කිරීමට ඉඩ තිබෙනවා “යැයි  ද අමාත්‍යවරයා කීවේය.

“රටට හා වැඩ ලෝකයට ගැලපෙන දැනුම පදනම් කරගත් සමාජයක් බිහි කිරීමට අවශ්‍ය තරුණ පරපුරක් නිර්මාණය කිරීම අපේ අරමුණයි. එහෙත් එම මැතිවරණ ප්‍රකාශනයෙන් තැත් කරන්නේ නැවත වැඩවසම් යුගයකට යාම සඳහායි.”

නිදහස් අධ්‍යාපන අවස්ථා පුළුල් කරමින් සෞඛ්‍ය සම්පන්න නිරෝගි සිසු පරපුරක් බිහිකර ගැනීමේ අරමුණ ඇතිව වත්මන් රජය ඉතිහාසයේ පළමුවරට ශ්‍රී ලංකාවේ සියලුම පාසල් දරුවන් එකවර රක්ෂණය කරමින් නොමිලේ ලබා දෙන සුරක්ෂා රක්ෂණාවරණයේ ප්‍රතිලාභ පිරිනැමීම අප්‍රමාදව සිදුකරයි.

2019 ඔක්තෝම්බර් මස 31වැනිදා වන විට සුරක්ෂා රක්ෂණ ප්‍රතිලාභ සඳහා හිමිකම් ලැබූ 40,125 දෙනෙකුට රුපියල් මිලියන 1,759 ක මුදලක් ප්‍රතිලාභ වශයෙන් ගෙවා අවසන් කර තිබේ.

අධ්‍යාපන අමාත්‍ය, නීතිඥ අකිල විරාජ් කාරියවසම් මහතාගේ උපදෙස් අනුව මෙවර සුරක්ෂා රක්ෂණාවරණයේ ප්‍රතිලාභ වැඩි කිරීමට ද විශේෂ පියවර කිහිපයක් ගෙන ඇත.

ඒ අනුව මේ වසරේ සිට සුරක්ෂා රක්ෂණාවරණයේ ප්‍රතිලාභ වැඩි කිරීමට සුවිශේෂි පියවර කිහිපයක් ගෙන ඇත. රජයේ රෝහල්ගත වන දිනකට ගෙවන මුදල රුපියල් 1.000/- සිට රුපියල් 3,000/- තෙක් වැඩි කිරීම. බාහිර ප්‍රතිකාර යටතේ ශ්‍රව්‍ය දෘෂ්‍ය උපකරණ, ඇස් කණ්ණාඩි වැනි උපකරණ ලබා ගැනීමේ හැකියාව, විශේෂඥ ‍වෛද්‍ය සේවා ගාස්තු ලබා ගැනීමේ හැකියාව, මුදල් ගෙවීමකින් තොරව රෝහල්ගත වීමේ හැකියාව, රෝහල් ගතවීමට පෙර දින 7ක් සහ රෝහලෙන් පිට වූ පසු දින 14ක් බෙහෙත් ලබා ගැනීමේ හැකියාව ද ලබා දීම ද ඒ අතර ප්‍රමුඛ වේ.

රජයේ හෝ පෞද්ගලික රෝහලක නේවාසික ප්‍රතිකාර සඳහා රුපියල් 200,000ක් ද, බාහිර ප්‍රතිකාර සඳහා රු.20,000ක් ද, අසාධ්‍ය රෝග ප්‍රතිකාර සඳහා රුපියල් 200,000ක සිට අවශ්‍යතාව අනුව ඒ සඳහා වැය වන මුළු මුදල ද, පූර්ණ අකර්මණ්‍යතාවක දී රු.200,000ක් ද, අර්ධ අකර්මන්‍යතාවක දී රු.150,000/- සිට රු. 200,000/-ක් දක්වා ද, මවුපිය වියෝවක දී එක් අයෙකුට රු.200,000/-බැගින් දෙදෙනාට ම ආවරණය ද, (පවුලේ සියලු දරුවන් සඳහා වෙන් වෙන් ව) ශිෂ්‍ය වියෝවක දී රු.150,000/- ක මුදලක් ද ප්‍රතිලාභ ලෙස පිරිනැමේ.

දරුවන්ගේ සෞඛ්‍යාරක්ෂාව වෙනුවෙන් අධ්‍යාපන අමාත්‍ය, නීතිඥ අකිල විරාජ් කාරියවසම් මහතා විසින් ඉතිහාසයේ ප්‍රථම වතාවට මෙරට පාසල් පද්ධතිය වෙත හඳුන්වා දෙනු ලැබූ මෙම සිසු රක්ෂණාවරණයෙහි ප්‍රතිලාභ අවුරුදු 5-21 වයස් සීමාවේ පසුවන සියලුම පාසල් දරුවන් වෙත නොපමාව ලබා දීම රජයේ අරමුණ බැවින් සුරක්ෂා ප්‍රතිලාභ ලබා ගැනීමේදී යම් ප්‍රමාදයක් හෝ වෙනත් ගැටළුවක් මතු වේ නම්, අධ්‍යාපන අමාත්‍යාංශයේ පාසල්සෞඛ්‍ය හා පෝෂණ ශාඛාවේ 0112369369, 0113641555, 0112784872 යන දුරකථන අංකවලට අමතා ඒ සම්බන්ධව දැනුම් දෙන ලෙස ද අමාත්‍යවරයා සඳහන් කරයි.

ශ්‍රී ලංකා ගුරු උපදේශක ‍සේවාව  නමින් වෙනම සේවාවක් ස්ථාපනය කිරීම වෙනුවෙන් සම්පාදනය කරන ලද ශ්‍රී ලංකා ගුරු උපදේශක සේවා ව්‍යවස්ථාවට අද (11) පැවති කැබිනට් මණ්ඩල රැස්වීමේ දී කැබිනට් අනුමැතිය හිමි වූ බව  අධ්‍යාපන අමාත්‍ය, නීතිඥ අකිල විරාජ් කාරියවසම් මහතා පැවසීය.

අධ්‍යාපනයේ ගුණාත්මක සංවර්ධනයට මෙන් ම විෂයමාලා නවීකරණයේ දී හා ඉගෙනුම් ඉගැන්වීම් ක්‍රියාවලිය නියාමනය කිරීමේ දී ගුරු උපදේශකවරුන්ගෙන් ඉමහත් දායකත්වයක් ලැබෙන අතර, විධිමත් සේවා ව්‍යවස්ථාවක් නොමැති ව වසර ගණනාවක් තිස්සේ නොවිසඳී පැවති මෙම ගැටළුවට ස්ථාවර විසඳුමක් ලබාදීමට හැකිවීම සමස්ත අධ්‍යාපන ක්ෂේත්‍රය ලැබූ සුවිශේෂ ජයග්‍රහණයක් බව ද, විෂය භාර අමාත්‍යවරයා වශයෙන් ඒ සඳහා තමාට නායකත්වය ලබාදීමට හැකිවීම සතුටට කරුණක් බව ද අමාත්‍යවරයා මෙහි දී වැඩිදුරටත් සඳහන් කළේය.  

ගුරු උපදේශක කාර්යය 1960 දශකයේ සිට ම ක්‍රියාත්මක ව පවතින  අතර, මෙම සේවාවේ වැදගත්කම සහ කාලීන අවශ්‍යතාව තමා විසින් හඳුනාගත් නිසා 2016 වසරේ සිට මේ සම්බන්ධ ව ගත් කඩිනම් ක්‍රියාමාර්ග හේතුවෙන් මේ අයුරින් ශ්‍රී ලංකා ගුරු උපදේශක ‍සේවාව ස්ථාපනය කිරීමට හැකි වූ බව අමාත්‍යවරයා සඳහන් කරයි.

ඒ අනුව, ඉදිරියේ දී  ශ්‍රී ලංකා ගුරු උපදේශක සේවාව සඳහා උපදේශකවරුන් 4,471ක් බඳවා ගැනෙන අතර, මෙම සේවාව ස්ථාපනය කිරීමත් සමඟ අධ්‍යාපන ක්ෂේත්‍රයේ මෙතෙක් පැවති ශ්‍රී ලංකා ගුරු සේවය, ශ්‍රී ලංකා විදුහල්පති සේවය, ශ්‍රී ලංකා ගුරු අධ්‍යාපනඥ සේවය, ශ්‍රී ලංකා අධ්‍යාපන පරිපාලන සේවය, අතරට අධ්‍යාපනයේ ගුණාත්මකභාවය ඉහළ නැංවීම වෙනුවෙන් ශ්‍රී ලංකා ගුරු උපදේශක සේවාව ද අලුතින් එක්වන අතර, එහි ගෞරවය වත්මන් අධ්‍යාපන අමාත්‍යවරයාට හිමිවෙයි.  

අධ්‍යාපන අමාත්‍ය, නීතීඥ අකිල විරාජ් කාරියවසම් මහතාගේ සංකල්පයක් අනුව ක්‍රියාවට නැංවෙන 13 වසරක සහතික කළ අධ්‍යාපන වැඩසටහන යටතේ හඳුන්වා දී ඇති උසස් පෙළ වෘත්තීය විෂය ධාරාව ක්‍රියාවට නංවන පාසල් වෙත  මූල්‍ය ප්‍රදාන ලබාදීමට මේ වනවිට පියවර ගෙන තිබේ.

ඒ අනුව, පාසල්වල උසස් පෙළ වෘත්තීය විෂය ධාරාව හදාරන ශිෂ්‍ය සංඛ්‍යාව පාදක කරගනිමින්, පළමු, දෙවැනි සහ තුන්වැනි අදියර යටතේ මෙම විෂය ධාරාව ක්‍රියාවට නැංවෙන පාසල් 299 කට රුපියල් 500,000 ක අවමයකට යටත් ව මෙම මූල්‍ය ප්‍රදාන වාරික වශයෙන් ලබාදීමට කටයුතු යොදා තිබේ. මේ සඳහා රුපියල් මිලියන 158ක මූල්‍ය ප්‍රතිපාදන යොදවා ඇත.

මෙම මූල්‍ය ප්‍රදාන ඵලදායී ලෙස යොදාගතයුතු බවට උපදෙස් ලබාදෙමින් අධ්‍යාපන අමාත්‍යාංශය විසින් 40/2018 චක්‍රලේඛය නිකුත් කර ඇති අතර,  ඒ අනුව  මෙම මූල්‍ය ප්‍රදානය පාසල් සංවර්ධන සමිති ගිණුමට බැර කරනු ලබයි. චක්‍රලේඛ විධිවිධානවලට අනුකූල ව නියමිත කාලසීමාව තුළ උපරිම කාර්යක්ෂමතාවයෙන් හා ඵලදායිතාවයෙන් යුතුව වෘත්තීය විෂය ධාරාව ක්‍රියාත්මක කිරීම සඳහා පමණක් මෙම මූල්‍ය ප්‍රදාන යොදවා ගැනීම ඒ ඒ පාසල්වල විදුහල්පතිවරුන්ගේ වගකීම වේ.

වෘත්තීය විෂය ධාරාවට අදාළ විෂය ක්‍රියාකාරකම්, විෂය සමගාමී සහ විෂය පරිබාහිර ක්‍රියාකාරකම් ක්‍රියාත්මක කිරීම හා ඉගෙනුම් පරිසර සංවර්ධනය, ඉගෙනුම් ඉගැන්වීම් ක්‍රියාවලිය සඳහා අවශ්‍ය ක්‍රියාකාරකම් පාසල් මට්ටමින් ඉටුකරලීමට අවැසි තීරණ ගත හැකි පරිදි පාසල බලාත්මක කිරීම මෙම මූල්‍ය ප්‍රදානයේ අරමුණයි.

 අනාගත වැඩලෝකයට අවශ්‍ය වෘත්තීය හැකියාවන් සහිත මානව සම්පත් පාසල් පද්ධතිය තුළින් බිහිකිරීම වෙනුවෙන් සාමාන්‍ය පෙළ සමත් අසමත්භාවය නොසලකා මෙම වෘත්තීය විෂය ධාරාව හැදෑරීමට සිසුන්ට අවස්ථාව සලසා දී ඇත. වසර 13ක අධ්‍යාපනයෙන් පසු ජාතික වෘත්තීය සුදුසුකම 4 (NVQ4) සහතිකය සහ ශ්‍රී ලංකා විභාග දෙපාර්තමේන්තුවෙන් පිරිනමන වෘත්තීය අධ්‍යාපනය පිළිබඳ උසස් සහතිකය (Advance Certificate in Vocational Education)  පිරිනැමීම ද මෙහි විශේෂත්වයයි.

 අවුරුදු දෙසීයකට අධික ඉතිහාසයකට හිමිකම් කියන ගාල්ල බොනවිස්ටා විද්‍යාලයය හා තවත් විදුහල් තුනක් ජාතික පාසල් බවට පත් කිරීමට අධ්‍යාපන අමාත්‍යනීති‍්ඥ අකිල විරාජ් කාරියවසම් මහතාගේ උපදෙස් අනුව පියවර ගෙන තිබේ

 මහනුවර ශාන්ත සිල්වෙස්තර විද්‍යාලයය, මඩකලපුව, වාලච්චේනයි හින්දු විද්‍යාලයය සහ අම්පාර, ඉරක්කාමම් අල්/අෂ්රොප් මධ්‍ය මහා විද්‍යාලයය ජාතික පාසල් බවට පත්වන අනෙක් විදුහල් තුනයි.

1814 වසරේ දී ආරම්භ කරන ලද ගාල්ල බොනවිස්ටා විදුහල 2017 වසර වනවිට ශිෂ්‍ය සංඛ්‍යාව 17 කට සීමා වී වැසී යන තත්ත්වයට පත්ව තිබිණි.

 විදුහලේ ඵෙතිහාසික අගය තේරුම්ගත් අධ්‍යාපන අමාත්‍ය නීති‍ඥ අකිල විරාජ් කාරියවසම් මහතාගේ මඟ පෙන්වීම හා උපදෙස් පරිදි විදුහල සංවර්ධනය කරනු ලැබීය. ආදිශිෂ්‍ය  සංගමය, පාසල් සංවර්ධන සමිතිය සහ පාසලට සහය දක්වන්නන්ගේ ද සහයෝගය ඇතිව මේ වනවිට විද්‍යාලය සීඝ්‍ර දියුණුවක් ලබා ඇත. ශ්‍රීමත් ඔලිවර් ගුණතිලක, මහාගත්කරු මාර්ටින් වික්‍රමසිංහ, මහාචාර්ය සෙනරත් පරණවිතාන, ආචාර්ය ඒ.ටී. ආරියරත්න, ආචාර්ය එඩ්වින් ආරියදාස, වැනි සුප්‍රකට පුද්ගලයන් මෙහි ආදි ශිෂ්‍යයෝ අතර වෙති.

මාලදිවයින් ජනාධිපති මව්මුන් අබ්දුල් ගයුම් මහතා ද බොනවිස්ටා විදුහලේ ආදි සිසුවෙකි. හෙතෙම පාසල් සිසුවකුව සිටිය දී 1948-1949 කාලයේ මෙරට වාසය කරන විට බොනවිස්ටා විදුහලේ ඉගෙනුම ලැබ ඇත.

පළාත් සභා යටතේ පවත්නා රජයේ පාසල් ජාතික පාසල් බවට පත් කිරිමේ දී සපුරාලිය යුතු නිර්ණායක පාදක කර ගනිමින් මෙම පාසල් ජාතික පාසල් බවට පත් කර ඇත. ඒ අනුව, කලාප අධ්‍යාපන අධ්‍යක්ෂ, පළාත් අධ්‍යාපන අධ්‍යක්ෂ සහ පළාත් ආණ්ඩුකාරවරයාගේ එකඟතාවත්, අදාළ එක් එක් පාසල්වල සේවයේ නියුතු සියලු ම අධ්‍යයන හා අනධ්‍යයන කාර්යමණ්ඩලවල සාමාජිකයන්ගේ ද එකඟතාවත් මත මෙම පාසල් ජාතික පාසල් බවට පත් කිරීමට කටයුතු යොදා තිබේ.

කිසියම් හේතුවක් මත මෙම පාසල් ජාතික පාසලක් ලෙස රජයට පවරා ගැනීම සම්බන්ධ ව එකඟතාව පළ නොකරන අධ්‍යයන හා අනධ්‍යයන සාමාජිකයින් යම් පාසලක සිටී නම් ඔවුන් වසර 3 ක සේවා කාලයකින් පසු පළාත් රාජ්‍ය සේවයට මුදාහැරීමට ද අවස්ථාව සලසා ඇත.

අලුතින් ජාතික පාසල් ලයිස්තුවට එක්වන මෙම පාසල් හතරත් සමඟම දැනට ශ්‍රී ලංකාවේ පාසල් පද්ධතිය තුළ පවත්නා ජාතික පාසල් සංඛ්‍යාව 374 දක්වා ඉහළ නැංවෙයි.

නේපාලයේ කත්මණ්ඩු නුවර දී මෙවර පැවැත්වීමට නියමිත 13 වැනි දකුණු ආසියානු ක්‍රීඩා උළෙලට ශ්‍රී ලංකාව නියෝජනය කරමින් සහභාගී වන සිසුන් 7 දෙනෙකු 2019 දෙසැම්බර් මාසයේ පැවැත්වෙන සාමාන්‍ය පෙළ විභාගයට පෙනී සිටීමට නියමිත අතර, අධ්‍යාපන අමාත්‍ය, නීතිඥ අකිල විරාජ් කාරියවසම් මහතාගේ උපදෙස් අනුව අධ්‍යාපනයේ තවත් සාධනීය පියවරක් සනිටුහන් කරමින් එම සිසුන්ට නේපාලයේ සිට එම විභාගයට පෙනී සිටීමේ අවස්ථාව සලසා තිබේ.

ශ්‍රී ලංකා විභාග දෙපාර්තමේන්තුව විසින් විදේශ කටයුතු අමාත්‍යාංශයේ ද සහාය ඇතිව නේපාලයේ ශ්‍රී ලංකා තානාපති කාර්යාලය සමග සම්බන්ධීකරණය වෙමින් මෙම අනගි අවස්ථාව තරගාවලියට එක්වන සාමාන්‍ය පෙළ විභාග අපේක්ෂක ශ්‍රී ලාංකීය දූදරුවන් වෙත සලසා දෙනු ලැබේ.

ශ්‍රී ලංකා විභාග දෙපාර්තමේන්තුවේ නීතීරීතිවලට යටත් ව, රහස්‍යභාවය, විශ්වසනීයබව හා ආරක්ෂාකාරීබව පවත්වාගනිමින් ශ්‍රී ලංකාවේ එම විභාගය පැවැත්වෙන වේලාවට අනුරූපව මෙම සිසුන් සඳහා නේපාලයේ කත්මණ්ඩු නුවරදී සාමාන්‍ය පෙළ විභාගය පැවැත්වීමට පියවර ඇත. ඒ  වෙනුවෙන් නේපාලය බලා පිටත්ව යන ශ්‍රී ලංකා විභාග දෙපාර්තමේන්තුවේ ජ්‍යේෂ්ඨ නිලධාරීන්ගෙන් සැදුම් ලත් කණ්ඩායමක් විසින් මෙම විභාගය සියලු අධීක්ෂණ කටයුතු සිදුකරන අතර එම නිලධාරීන්ගේ ගුවන් ප්‍රවේශපත් හා නවාතැන් සඳහා වියදම් ජාතික ඔලිම්පික් කමිටුව විසින් දැරීමට එකඟ වී ඇත.

අධ්‍යාපනයෙන් බිහිකළ යුත්තේ සමබර පෞරුෂයෙන් යුත් දරු පරපුරක් වන බවත්,  ක්‍රීඩාව නිසා විභාග හෝ විභාග නිසා දරුවන්ගේ ක්‍රීඩා හැකියාවන් හෝ අතපසුකිරීමට ඉඩ නොතබා  මේ අයුරින් කටයුතු කිරීමට හැකිවීම අධ්‍යාපනයේ සාධනීය පියවරක් බවත් මේ සම්බන්ධ ව අදහස් පළ කරමින් අධ්‍යාපන අමාත්‍යවරයා සඳහන් කළේය.

මෙරට අධ්‍යාපන පද්ධතියේ ගුණාත්මකභාවය ඉහළ නැංවිය හැක්කේ ගුරු සේවා ව්‍යාවස්ථාවට අනුව ගුරුවරුන් බඳවා ගැනීමෙන් මිස, දේශපාලන හිතවතුන් ගුරු සහායකයින් ලෙස බඳවා ගැනීමෙන් නොවන බවත් අධ්‍යාපන අමාත්‍ය, නීතීඥ අකිල විරාජ් කාරියවසම් මහතා සඳහන් කරයි.

පොදුජන පෙරමුණේ ජනාධිපති අපේක්ෂකයා ජයග්‍රහණය කළහොත්, ගම් මට්ටමින් 50,000ක් ගුරු සහායකයින් ලෙස පාසල් පද්ධතිය වෙත බඳවා ගැනීමට කටයුතු කරන බවට පසුගිය දා පාර්ලිමේන්තු මන්ත්‍රී බන්දුල ගුණවර්ධන මහතා විසින් සිදුකරන ලද ප්‍රකාශයක් සම්බන්ධයෙන්  අමාත්‍යවරයා මේ අදහස් පළ  කර සිටියි.

ගුරු සේවා ව්‍යවස්ථාවේ අනුව උපාධිධාරීන්, විද්‍යාපීඨ ශික්ෂණ විද්‍යා ඩිප්ලෝමාධාරීන්, සෙසු ඩිප්ලෝමාධාරීන් මෙන් ම උසස් පෙළ සමතුන් ගුරුවරුන් ලෙස බඳවාගැනීමට හැකියාව  පැවතිය දී, උසස් පෙළ සමතුන් ගුරු සහායකයින් ලෙස බඳවා ගැනීමෙන් සිදුවන්නේ පසුගිය වසර කිහිපය තුළ මෙරට අධ්‍යාපන පද්ධතියේ ගුණාත්මකභාවය හෑල්ලුවට ලක්කිරීමක් බව ද, එය මෙරට තරුණ පරපුර මුළා කරමින් ඔවුන්ගේ ඡන්දය සොරාගැනීමට සිදුකරන කූඨ දේශපාලනික ප්‍රයත්නයක් බව ද අමාත්‍යවරයා වැඩිදුරටත් ප්‍රකාශ කරයි.

2015 වසරේ සිට මේ දක්වා මෑතකාලීන ව මෙරට පාසල් අධ්‍යාපන පද්ධතියට උපාධිධාරීන්, විද්‍යාපීඨ ඩිප්ලෝමාධාරීන්, සෙසු ඩිප්ලෝමාධාරීන්, සහ උසස් පෙළ සමතුන්   25,000කට ආසන්න පිරිසක් ගුරුවරුන් ලෙස බඳවාගෙන ඇති බව ද, පසුගිය දා පළමු වරට ජාතික අධ්‍යාපන විද්‍යාපීඨ සඳහා ශික්ෂණලාභීන් 8000ක් බඳවාගත් බවත්,  ඒ අනුව තමා ගත් මෙම ක්‍රියාමාර්ග හේතුවෙන් ඉදිරි වසර කිහිපය ඇතුළත මෙරට පාසල් පද්ධතිය තුළ පවත්නා ගුරු හිඟය සම්පූර්ණයෙන් ම තුරන් කිරීමට නියත වශයෙන් ම හැකිවනු ඇති බවත් අමාත්‍යවරයා පවසයි.

පටු දේශපාලන අරමුණු ඉටු කරගැනීම වෙනුවෙන්, ගුරුවරුන් බඳවා ගැනීමේ විධිමත් ක්‍රමවේද මඟහැර, අධ්‍යාපන පද්ධතියේ ගුණාත්මකභාවය හෑල්ලුවට ලක්කරමින් මෙරට ගුරු සේවය වඩාත් ප්‍රශස්ත සේවාවක් ලෙස දිනා සිටින ගෞරවය විනාශ කිරීමට සිහින මැවීම කණගාටුවට කරුණක් බව ද අමාත්‍යවරයා තවදුරටත් කියාසිටියි.

           සංදර්ශනවලින් තොරව සිදුකරන ලද වැඩපිළිවෙල මීටත් වඩා යෝධ සංවර්ධනයක් කරා ගෙනයාමට ශක්තිය ලබා දීම සඳහා හංසයා ලකුණ ඉදිරියේ කතිරය ගසන්නැයි එක්සත් ජාතික පක්ෂයේ මහලේකම් අධ්‍යාපන අමාත්‍ය, නීතිඥ අකිල විරාජ් කාරියවසම් මහතා කුලියාපිටිය කොට්ඨාශයේ පැවැති ජනහමු අමතමින් ප්‍රකාශ කළේය.

          රාජපක්ෂ ආණ්ඩුව අවුරුදු දෙකක් ඉතිරිව තිබිය දි 2015 දී ජනාධිපතිවරණයක් පැවැත්වූයේ ආර්ථිකය බිඳ වැටීම, ජාත්‍යන්තරය හමුවේ කොන් වී සිටීම වැනි  කරුණු හේතුවෙන් බවත් ඒ වනවිට පැවැති සුදු වෑන් සංස්කෘතිය, මාධ්‍යවේදීන් ඝාතනය කිරීම, මාධ්‍ය ආයතන ගිනි තැබීම මෙන් ම ඉහ වහා ගිය දූෂණය හා හොරකම වැනි දේ නිසා ජනතාවට ද වෙනසක අවශ්‍යතාව තදින්ම පැවැති බවත් මහලේකම්වරයා පැවසීය.

           2015 ජනපතිවරණයෙන් පත්කර ගන්නා ලද ජනාධිපතිවරයා නිර්පාක්ෂික වේයැයි කල්පනා කළ නමුත් එසේ නොවූ බවත්, බාධා හා අමාරුකම් මධ්‍යයේ ජාතික ආණ්ඩුවක් නිර්මාණය කරන ලද බවත්,රටට වැදගත් යෝජනාවක් ඉදිරිපත් කර කටයුතු කරගෙන යන විට එය නැවැත්වීමට ක්‍රියා කළ අයත් කැබිනට් මණ්ඩලයේ සිටි බවත් සිහිපත් කළ මහලේකම්වරයා එවැනි බාධා හා දුෂ්කරතා හමුවේ ක්‍රියාකරන විට දී දින 52ක අර්බුදයකට ඇද දැමූ බව ද එය නිරාකරණය කරගැනිමෙන් පසු ඉකුත් හය මාසයේ දී වේගයෙන් වැඩකිරීමට හැකි වූ බව ද ප්‍රකාශ කළේය.

මහලේකම්වරයා මෙසේ ද පැවසීය.

         “ කුමන බාධා ආවත් අපට කළ හැකි උපරිම වේගයෙන් විශාල වැඩකොටසක් ඉටුකර තිබෙනවා. රාජ්‍ය සේවය වැටුප 107% කින් වැඩිකළා. මීට අවුරුදු පහකට පෙර තිබූ බඩු මිලට වඩා අත්‍යාවශ්‍ය භාණ්ඩවල මිල සංසන්දනය කර බලන්න. කිරිපිටි, පරිප්පු, සීනි ආදී අත්‍යවශ්‍ය ද්‍රව්‍යවල  මිල  වගේ ම ඩීසල්, පෙට්‍රල්, ගැස් මිල ද 2015 දි අපේ ආණ්ඩුව එන්න පෙර තිබූ මිලට වඩා තවමත් අඩු බව ද මහලේකම්වරයා පෙන්වා දුන්නේය.

“අපට ඇතැම් මාධ්‍යවල මෙතරම් පහර දෙන්නේ ඇයි? ඒ අප ඇති කරන ලද නිදහස නිසයි. ඇතැම් පෞද්ගලික මාධ්‍යවල දේශපාලන පක්ෂවලට හා අපේක්ෂකයන්ට ලබාදෙන වෙලාව කොපමණද? සජිත් ප්‍රේමදාස මහත්මයාට හා රාජපක්ෂ මහත්මයාට දෙන වෙලාව බලන්න. ගෝඨාභයට එක වෙලාවක්. මහින්ද රාජපක්ෂ මහත්මයාට තවත් වෙලාවක්. හැබැයි ඔහු අපේක්ෂකයෙක් නොවේ. පෞද්ගලික මාධ්‍යයට තමන්ගේ වෙනම පෞද්ගලික න්‍යාය පත්‍ර තිබෙනවා. ඔවුන් එහෙම කරන්නේ අප ලබා දුන් නිදහස නිසයි. ඇත්තෙන් ම රාජපක්ෂ යුගයේ එහෙම කළා නම් ජිවිත ගැන පවා ප්‍රශ්නයක් වීමට තිබුණා.

            අධ්‍යාපන අමාත්‍යාංශය පමණක් කරන ලද වැඩ අතිවිශාලයි. මගේ ම සංකල්පයක් වූ ළඟම පාසල- හොඳම පාසල වැඩසටහන මගින් රටපුරා පාසල් 10,000න් පාසල් 9,500 කට වඩා ප්‍රතිලාභ දුන්නා. නව ගොඩනැගිලි 3,000ක් පමණ ලබා දුන්නා. වැසිකිළි  ඒකක 40,000ක් නිම කළා. මේ විදිහට විවෘත කර අවසන් කළ නොහැකි තරමට පාසල්වල ඉදිකිරිම් සිදුකළා. පාසල් දරුවන් හතළිස් පන් ලක්ෂයක් සුරක්ෂා රක්ෂණය මගින් රක්ෂණය කළා. රක්ෂණය වු එම දරුවෙකුගේ මව හෝ පියාගේ ස්වාභාවික මරණයක දී පවා රුපියල් දෙලක්ෂයක් ලබා දෙනවා. ගුරු විදුහල්පති වැටුප් හා දීමනා වැඩිකළා. 

    රුපියල් කෝටි 1750 ක වියදමින් කුලියාපිටියේ ශික්ෂණ රෝහලක් ඉදිකෙරනවා. ඊට පෙර වෛද්‍ය පීඨයක් ආරම්භ කළා. කුරුණෑගල දිස්ත්‍රික්කයට ම විශාල සංවර්ධනයක් හිමිකර දීමට අපට හැකිවුණා. කුරුණෑගල දිසාවේ සංවර්ධනය ආසන දහහතරටම ගිහින් බලන්න. උතුර නැගෙනහිර ඇතුලු රට පුරා ගිහින් බලන්න. මා අධ්‍යාපන ඇමතිවරයා වශයෙන් ලඟම පාසල - හොඳම පාසල වැඩ සටහන යටතේ ලබා දුන් ගොඩනැගිලි, විද්‍යාගාර  ආදී සම්පත් දෙස බලන්න.

             සංදර්ශන නැතිව අප වැඩ පෙන්වා තිබෙනවා. මේ වැඩපිළිවෙල මිට වඩා යෝධ සංවර්ධනයක් බවට පත්කර දීමට ශක්තිය ලබා දීම සඳහා හංසයා ලකුණ ඉදිරියේ කතිරය ගසන්න. එමගින්  හංසයාගේ ජයග්‍රහණයත් සමග ඉදිරි කාලයේ දී ඔබේ ප්‍රදේශයට, කොට්ඨාශයට මදි නොකියන්න සංවර්ධනය ළඟාකර දෙනවා.”

Search