.jpg)
අතීත උරුමයන් අනාගතයට පැවරීම වර්තමානයේ ජීවත් වන අපගේ වගකීමක් බව අධ්‍යාපන අමාත්‍ය අකිල විරාජ් කාරියවසම් මහතා පවසනවා. අග්‍රාමාත්‍ය රනිල් වික්‍රමසිංහ මහතාගේ ප්‍රධානත්වයෙන්, අද අරලියගහ මන්දිරයේ දී “ පින් බිම් 12000 ක් යලි අස්වද්දන මහා ජාතික යහ මෙහෙවර ” යන තේමාව පෙරදැරි කරගත් සසුනෝදය ජාතික වැඩසටහනට අදාළව, විහාරස්ථාන 1000 ක ප්‍රතිසංස්කරණ හා සංරක්ෂණ කටයුතු සඳහා මූල්‍යධාර පිරිනැමීමේ ජාතික උත්සවයට එක්වෙමින් අමාත්‍යවරයා මේ බව ප්‍රකාශ කළා.
පසුගිය කාලයේ දී අක්‍රමවත්ව ක්‍රියාත්මක වූ මධ්‍යම සංස්කෘතික අරමුදල ක්‍රමවත් කරමින්, ව්‍යාජ බෞද්ධයන් ලෙස නොව සැබෑ බෞද්ධයන් ලෙස වත්මන් රජය මෙවන් සත් ක්‍රියාවකට මුල පිරූ බව අධ්‍යාපන අමාත්‍යවරයා මෙහි දී පැහැදිලි කළා. බෞද්ධ සිද්ධස්ථාන සඳහා මෙන්ම සෙසු ආගමික සිද්ධස්ථාන සඳහා ද සසුනෝදය ජාතික වැඩසටහන යටතේ මුල්‍යාධාර පිරිනැමීමට රජය තීරණය කර ඇති බවත් මෙම වසරින් නොනැවතී ලබන වසරේ දී ද තවත් බෞද්ධ විහාරස්ථාන 1000 ක් සඳහා මූල්‍යාධාර පිරිනැමීට රජය කටයුතු කරන බවත් අමාත්‍යවරයා මෙහි දී වැඩිදුරටත් කියා සිටියා.
මෙහි දී උත්සව සභාව ඇමතු අග්‍රාමාත්‍ය රනිල් වික්‍රමසිංහ මහතා පැවසුවේ රටෙහි ඒකීය භාවය ආරක්ෂා කිරීමත්, බෞද්ධාගම සඳහා ප්‍රමුඛ ස්ථානය ලබා දීමත් වත්මන් යහපාලන රජයේ දේශපාලන න්‍යාය පත්‍ර‍යේ මූලික අංගයක් බවයි. සසුනෝදය ජාතික වැඩසටහන සඳහා අධ්‍යාපන අමාත්‍ය අකිල විරාජ් කාරියවසම් මහතාගේ මැදිහත්වීම, මෙහිදී අග්‍රාමාත්‍ය රනිල් වික්‍රමසිංහ මහතාගේ පැසසුමට ලක් වීම ද විශේෂත්වයක්.
සසුනෝදය ජාතික වැඩසටහන යටතේ දිවයින පුරා පිහිටි බෞද්ධ වෙහෙර විහාරස්ථාන 1000 ක් සඳහා රුපියල් මිලියන 500 කට ආසන්න මූල්‍ය ප්‍රතිපාදන මෙම උත්සවයේ දී පිරිනැමුනා. ශ්‍රී ලංකාවේ ඇති 12000 කට අධික බෞද්ධ වෙහෙර විහාරස්ථාන සංරක්ෂණය කොට සංවර්ධනය කිරීම සඳහා සමස්ත දිවයින ම ආවරණය කරමින් මෙවැනි දැවැන්ත ව්‍යාපෘතියක් ආරම්භ කෙරුණු ප්‍රථම අවස්ථාව ද මෙය වීම විශේෂත්වයක්. අමරපුර මහානිකායේ මහනායක අග්ගමහා පණ්ඩිත පුජ්‍ය කොටුගොඩ ධම්මාවාස මහනාහිමියන් ප්‍රමුඛ මහා සංඝරත්නය, මැති ඇමතිවරුන්, රාජ්‍ය නිලධාරීන් සහ උවැසි උවැසියන් ඇතුළු දහස් සංඛ්‍යාත පිරිසක් මෙම අවස්ථාවට එක් වුණා.
