නවතම පුවත්

දැයේ දරුවන් හට කියවීම ඇබ්බැහි කරවීම අධ්‍යාපන අමාත්‍යාංශයේ පරමාර්ථය වන බව අධ්‍යාපන අමාත්‍ය අකිල විරාජ් කාරියවසම් මහතා පවසනවා.

අමාත්‍යවරයා මේ අදහස් පළ කළේ අද (06) අධ්‍යාපන අමාත්‍යාංශ පරිශ්‍රයේ දී පැවති, සිය සංකල්පයකට අනුව නිර්මාණය වූ ‘2018-2019 කලණ මිතුරු පොත් සුමිතුරු’ තිරසර කියවීම් ප්‍රවර්ධන වැඩසටහනේ සමාරම්භක උත්සවයට එක්වෙමින්.

අමාත්‍යවරයා පෙන්වා දෙන්නේ විවිධ අහිතකර පුරුදු සහ නොයෙක් විෂමාචාර ක්‍රියාවලට ඇබ්බැහි වීමේ අවධානමක් ඇති තරුණ සමාජයකට කියවීම ඇබ්බැහි කරවීම විප්ලවීය සංකල්පයක්ම වන බවයි.

දරුවන් තුළ කියවීම ඇබ්බැහි කරවීම යනු දැනුමෙන් සහ බුද්ධියෙන් සවිබල ගැන්වුනු අනාගත පරපුරක් රටට නිර්මාණය කිරීමක් වන බව අමාත්‍යවරයා මෙහි දී පෙන්වා දුන්නා. ඒ තුළින් රටේ සංවර්ධනය සඳහා ශක්තිමත් පදනමක් සැකසිය හැකි බවත් එය රටේ මානව සම්පත දියුණු කිරීම සඳහා ඉමහත් පිටිවහලක් වන බවත් අධ්‍යාපන අමාත්‍ය අකිල විරාජ් කාරියවසම් මහතා මෙහිදී කියා සිටියා.

අමාත්‍ය අකිල විරාජ් කාරියවසම් මහතා මෙහිදී පෙන්වා දුන්නේ, දරුවන් තුළ කියවීමේ රුචිය වර්ධනය කරවීමේ දැඩි අවශ්‍යතාවය මෙන්ම කියවීමේ වටිනාකම ද අධ්‍යාපන අමාත්‍යාංශය විසින් සහ වත්මන් රජය විසින් හොඳින් අවබෝධ කරගෙන ඇති බවයි.

සීමා මායිම්වලට කොටු නොවී කියවීම ඉතා පුළුල් පරිසරයකට විහිදුවාලමින්, විවිධ වර්ගයේ පොත් කියවීම තුළ විවිධ අංශවලින් දැනුම් වර්ධනය කරගැනීමට ළමුන් පෙළඹවිය යුතු බවත් අමාත්‍යවරයා මෙහි දී පැහැදිලි කළා.

එමෙන්ම සියලු රජයේ පාසල්වල පුස්තකාල තව තවත් විධිමත් කරමින් ඒවායේ මානව සම්පත් තව තවත් වැඩි වර්ධනය කිරීම ද රජයේ අපේකෂාව වන බව අධ්‍යාපන අමාත්‍ය අකිල විරාජ් කාරියවසම් මහතා මෙහිදී ප්‍රකාශ කළා.

කියවන සිසුන් තව තවත් උනන්දු කරවමින් ඔවුන් අගය කිරීම තුළ රටේ මහා දැනුම් විප්ලවයක් ඇති කළ හැකි බවත් එවන් සිසු පරපුරක් නිර්මාණය කිරීම සඳහා වැය කරන මුදල රටට තවත් වියදමක් ලෙස නොව රටට තවත් වටිනා ආයෝජනයක් ලෙස සැලකිය යුතු බවත් අමාත්‍යවරයා මෙහිදී පෙන්වා දුන්නා.

දිවයිනේ පාසල්වල 06 සිට 13 ශ්‍රේණිවල ඉගෙනුම ලබන සිසුන් සඳහා මෙම ‘කලණ මිතුරු පොත් සුමිතුරු’ තිරසර කියවීම් ප්‍රවර්ධන වැඩසටහන ක්‍රියාත්මක වනවා. පදක්කම් වැඩසටහන සහ ප්‍රාසාංගික වැඩසටහන ලෙස අංශ දෙකකින් එම වැඩසටහන සමන්විතයි.

පදක්කම් වැඩසටහන යටතේ කියවන ලද එක් එක් පොත් වෙනුවෙන් ලියන ලද කාර්ය සටහන් පත්‍රිකාවලින් 50% කට වඩා ලකුණු ලබාගත් සටහන් වාර්තා 50ක් සම්පූර්ණ කරන සිසුන් (පොත් 50ක් කියැවූ සිසුන්) වෙත රිදී පදක්කම ද, කියවන ලද එක් එක් පොත් වෙනුවෙන් ලියන ලද කාර්ය සටහන් පත්‍රිකාවලින් 50% කට වඩා ලකුණු ලබාගත් සටහන් වාර්තා 75ක් සම්පූර්ණ කරන සිසුන් (පොත් 75ක් කියැවූ සිසුන්) වෙත රන් පදක්කම ද, කියවන ලද එක් එක් පොත් වෙනුවෙන් ලියන ලද කාර්ය සටහන් පත්‍රිකාවලින් 50% කට වඩා ලකුණු ලබාගත් සටහන් වාර්තා 100ක් සම්පූර්ණ කරන සිසුන් (පොත් 100ක් කියැවූ සිසුන්) වෙත ප්ලැටිනම් පදක්කම ද පිරිනැමෙනු ඇති.

ප්‍රාසාංගික වැඩසටහන පාසල්, කලාප, පළාත් සහ ජාතික මට්ටමින් ක්‍රියාත්මක කරනු ලබයි. එහි ප්‍රථම අදියර වන පාසල් මට්ටමේ දී පාසල් පුස්තාකලයේ පොත් අතරින් හෝ අධ්‍යාපන අමාත්‍යාංශය විසින් පාසල්වල භාවිතය සඳහා අනුමත කළ පොත් අතරින් ළමුන්ගේ කැමැත්ත පරිදි සුදුසු කෘතියක් තෝරාගෙන ඊට අදාළ කාර්ය සටහන් පත්‍රිකා ගොනුව සම්පූර්ණ කර පන්තිභාර ගුරුවරයාට බාර දිය යුතුයි. දෙවන අදියරයේ දී එසේ පාසල් මට්ටමින් එවනු ලබන කියවන්නන් අතුරෙන් කලාප මට්ටම සඳහා හොඳම කියවන්න් 20 දෙනෙකු තෝරා ගැනේ. කලාප මට්ටමින් තෝරා එවනු ලබන හොඳම කියවන්නන් 20 දෙනාගෙන් පළාත් මට්ටම සඳහා හොඳම 10 දෙනා තෝරාගැනීම් මෙහි තෙවැනි අදියරයයි. සිවුවන අදියරයේ දී සිදුවන්නේ පළාත් මට්ටමේ හොඳම කියවන්නන් අතර ජාතික මට්ටමින් ප්‍රශ්න විචාරාත්මක රියැලිටි රූපවාහිනී වැඩසටහනක් පැවැත්වීමයි. එමෙන්ම මෙම වැඩසටහන යටතේ වසරක් පාසා තෝරාගැනෙන හොඳම කියවන්නන් 100 ක් සඳහා විදේශ ශිෂ්‍යත්ව පිරිනැමීමට ද නියමිතයි.

‘2018 – 2019 කලණ මිතුරු පොත් සුමිතුරු’ තිරසර කියවීම් වැඩසටහට අදාළ චක්‍ර‍ලේඛය සහ උපදෙස් සංග්‍රහය පිළිගැන්වීම මෙන්ම එම වැඩසටහන යටතේ ජයග්‍රාහී සිසුන්ට පිරිනැමෙන රිදී, රන් සහ ප්ලැටිනම් පදක්කම් එළි දැක්වීම ද අද සිදුවුනේ අධ්‍යාපන අමාත්‍ය අකිල විරාජ් කාරියවසම් මහතා අතින්.

අධ්‍යාපන රාජ්‍ය අමාත්‍ය වී.රාධක්‍රිෂ්ණන්, අධ්‍යාපන ලේකම් සුනිල් හෙට්ටිආරච්චි, අතිරේක ලේකම් අශෝක සේනානි හේවගේ , අධ්‍යාපන අමාත්‍යාංශයේ පාසල් පුස්තකාල සංවර්ධන අංශයේ අධ්‍යාපන අධ්‍යක්ෂ ආර්.එච්.එන්. නන්දසිරි යන මහත්වරුන් සහ ජාතික පුස්තකාල හා ප්‍රලේඛන සේවා මණ්ඩලයේ සභාපති දීපාල් චන්ද්‍රරත්න මහතා ඇතුළු නිලධාරීන් රැසක් මේ අවස්ථාවට එක්ව සිටියා.

 

පසුගිය රජය යටතේ අධ්‍යාපන පද්ධතියේ සිදු වූ ඇතැම් දේ පිළිබඳව බරපතල ගැටළු පවතින බව අධ්‍යාපන අමාත්‍ය අකිල විරාජ් කාරියවසම් මහතා පවසනවා.

අමාත්‍යවරයා පෙන්වා දෙන්නේ පසුගිය කාලවකවානුවේදී ශ්‍රී ලංකා ගුරු අධ්‍යාපනඥ සේවයේ 1190 ක හිඟයක් සහිතව විද්‍යාපීඨ තුළ වසරකට ශික්ෂණලාභීන් 4000 ත්, 5000 ත් අතර සංඛ්‍යාවක් පුහුණු කර ඇති ආකාරය බරපතල ගැටළුවක් බවයි. ශ්‍රී ලංකා ගුරු අධ්‍යාපනඥ සේවයේ III වන ශ්‍රේණිය සඳහා සීමිත පදනම මත පත්කෙරණු 353 කු සඳහා පත්වීම් ලිපි ප්‍රදානය නිමිත්තෙන් අද (20) අරලියගහ මන්දිරයේ දී පැවති උත්සවයට එක්වෙමින් අමාත්‍යවරයා මේ අදහස් පළ කළා.

අමාත්‍යවරයා කියා සිටියේ, වර්තමානයේ දී අධ්‍යාපන පද්ධතිය වෙනුවෙන් සිදුකෙරෙමින් පවතින සියලු පත්කිරීම් දේශපාලනයෙන් තොරව, නිසි ක්‍රමවේදයකට අනුව සිදුකරන ලද පත්වීම් බවයි. රටේ සියලු දරුවන් සඳහා අධ්‍යාපනය ලබා දෙන ගුරුවරුන් පුහුණු කරවීමේ වගකීම ගුරු අධ්‍යාපනඥයින් සතු වන බවත්, එබැවින් ගුරු අධ්‍යාපනඥයින් සඳහා ගැඹුරු මෙන්ම පුළුල් සමාජ වගකීමක් පවතින බවත් අමාත්‍යවරයා මෙහිදී පෙන්වා දුන්නා.

වත්මන් අග්‍රාමාත්‍ය රනිල් වික්‍රමසිංහ මහතා එවක අධ්‍යාපන අමාත්‍යවරයාව සිටි අවධියේ දී එතුමන් විසින් මෙම විද්‍යාපීඨ සංකල්පය ආරම්භ කළ බවත්, එම යුගයෙන් පසුව ඒ සඳහා දිය යුතු ප්‍රමුඛතාව පසුගිය සමයේ දී ලබා දී නොමැති බවත් මෙහිදී අධ්‍යාපන අමාත්‍ය අකිල විරාජ් කාරියවසම් මහතා සඳහන් කළා.

මෙහිදී අදහස් දැක්වූ අධ්‍යාපන රාජ්‍ය අමාත්‍ය වී. රාධක්‍රිෂ්ණන් මහතා පැවසුවේ පසුගිය රජයන් යටතේ මෙන් අධ්‍යාපන පද්ධතිය සඳහා හුදෙක් දේශපාලන පත්වීම් සිදු නොකොට වර්තමානයේ දී විධිමත් සහ ක්‍රමවත් අයුරින් පත්වීම් සිදුකිරීම සම්බන්ධයෙන් සතුටු විය යුතු බවයි.

පුරවැසි යුතුකම්, සමාජ වගකීම් මෙන්ම සමාජීය විනය යන කරුණු ගිලිහෙමින් පවතින සමාජයක එම යුතුකම් සහ වගකීම් මෙන්ම සමාජ විනය ද හොඳින් දන්නා අනාගත පරපුරක් නිර්මාණය කිරීම වෙනුවෙන් ඇප කැප වී ක්‍රියා කරන ලෙස මෙම උත්සවයට එක් වූ කථානායක කරු ජයසූරිය මහතා ප්‍රකාශ කළා.

2016 වර්ෂයේ පැවැති ශ්‍රී ලංකා ගුරු අධ්‍යාපනඥ සේවයේ iii ශ්‍රේණියට සීමිත පදනම මත බඳවා ගැනීම සඳහා පවත්වන ලද තරග විභාගයේ ප්‍රතිඵල අනුව සුදුසුකම් ලද අයදුම්කරුවන් සඳහා පැවැති සම්මුඛ පරීක්ෂණයේ සහ ප්‍රායෝගික පරීක්ෂණයේ ප්‍රතිඵල මත සිංහල මාධ්‍ය 223 දෙනෙකු සහ දෙමළ මාධ්‍ය 130 දෙනෙකු සඳහා අද පත්විම් ලිපි ප්‍රදානය කෙරුණා.

මේ අවස්ථාවට අධ්‍යාපන අමාත්‍යාංශයේ අධීක්ෂණ මන්ත්‍රීවරුන් වන මහාචාර්ය ආෂු මාරසිංහ, ඉම්රාන් මහරූෆ්, අධ්‍යාපන අමාත්‍යාංශයේ ලේකම් සුනිල් හෙට්ටිආරච්චි සහ අතිරේක ලේකම් හේමන්ත ප්‍රේමතිලක යන මහත්වරුන් ඇතුළු නිලධාරීන් රැසක් එක්ව සිටියා.

 

 

ෆින්ලන්ත නියෝජ්‍ය අධ්‍යාපන අමාත්‍ය පෙට්රි පෙල්ටෝනස් මහතා සහ මෙරට අධ්‍යාපන අමාත්‍ය අකිල විරාජ් කාරියවසම් මහතා අතර විශේෂ හමුවක් අද (12) අධ්‍යාපන අමාත්‍යාංශ පරිශ්‍රයේ දී පැවැත්වුණා.

මෙරට අධ්‍යාපන ක්ෂේත්‍රය දියුණු කිරීමට අදාළ පියවර සහ සැලසුම් පිළිබඳව මෙම හමුවේ දී දීර්ඝ වශයෙන් සාකච්ඡා කෙරුණු අතර නවීන අධ්‍යාපන ක්‍රමවේද ඔස්සේ මෙරට සිසුන්ගේ අධ්‍යාපනයේ ගුණාත්මක බව උසස් කිරීමට අදාළ නව ප්‍රතිපත්තීන් සහ සැලසුම් පිළිබඳව අදහස් සහ යෝජනා පිළිබඳව මෙම විශේෂ හමුවේ දී සලකා බලනු ලැබුවා.

පසුගිය වසරේ දී අග්‍රාමාත්‍ය රනිල් වික්‍රමසිංහ මහතා සහ අධ්‍යාපන අමාත්‍ය අකිල විරාජ් කාරියවසම් මහතා ෆින්ලන්තයේ නිල සංචාරයක නිරත වූ අතර මෙරට අධ්‍යාපන ක්ෂේත්‍රය දියුණු කිරීමට අවශ්‍ය නවීන දැනුම සහ ක්‍රමෝපායන් පිළිබඳව එහිදී ඔවුන් අධ්‍යනයක නිරත වුණා.

එමෙන්ම මෙරට තාක්ෂණික සහ වෘත්තිය අධ්‍යාපනය දියුණු කිරීමට අවශ්‍ය සහයෝගය ලබාදීමට ෆින්ලන්ත රජය විසින් අග්‍රාමාත්‍යවරයාට සහ අධ්‍යාපන අමාත්‍යවරයාට පොරොන්දු වනු ලැබුවා.

එම පොරොන්දුව පරිදි අධ්‍යාපන අමාත්‍යාංශය විසින් මේ වන විට ක්‍රියාත්මක කර ඇති 13 වසරක අඛණ්ඩ අධ්‍යාපන වැඩසටහන සඳහා ෆින්ලන්ත රජයේ සහය ලබා දීමට එම රජය තීරණය කර ඇති බව මෙම විශේෂ හමුවේ දී එරට නියෝජ්‍ය අධ්‍යාපන අමාත්‍ය පෙට්රි පෙල්ටෝනස් මහතා සඳහන් කළා.

ඒ අනුව, තාක්ෂණික, වෘත්තිය සහ තොරතුරු තාක්ෂණය ඇතුළු විවිධ විෂය පථයන් දියුණු කිරීම සඳහා ෆින්ලන්ත රජයේ මැදිහත් වීම ඉදිරියේ දී ලබා දීමට නියමිතයි.

 

 

පසුගිය සමයේ අධ්‍යාපන ක්ෂේත්‍රය කඩා වැටෙද්දී මුණිවත රකිමින් සිටි ඇතැම් වෘත්තීය සමිති අද අධ්‍යාපනයේ සාර්ථකත්වය හමුවේ තම ජනප්‍රියත්වය උදෙසා විවිද පදනම් විරහිත චෝදනා එල්ල කරන බව අධ්‍යාපන අමාත්‍ය අකිල විරාජ් කාරියවසම් මහතා පවසනවා.

සුපිරි පාසැල් වෙනුවට සියලු පාසැල් සපිරි පාසැල් බවට පත් කිරීමේ අරමුණ ඇතිව අධ්‍යාපන අමාත්‍යතුමන්ගේ උපදෙස් අනුව ක්‍රියාත්මක ළඟම පාසැල හොඳම පාසැල වැඩසටහන යටතේ බළපිටිය රේවත ජාතික පාසැලේ ඉදි කෙරුණු නව තෙමහල් ගොඩනැගිල්ල සිසු අයිතියට පත් කිරීමේ අවස්ථාවට අද (01) එක් වෙමින් අමාත්‍යවරයා මේ බව සඳහන් කළා.

වැඩිදුරටත් අදහස් දැක්වූ අකිල විරාජ් කාරියවසම් මහතා පෙන්වා දුන්නේ ජාතික පාසැල්වලට විදුහල්පතිවරුන්ගේ හිඟයක් ඇති බවට ඇතැම් වෘත්තීය සමිති කරනු ලබන ප්‍රකාශයන් පාසැල් ප්‍රජාව සහ ජනතාව නොමග යවන ප්‍රකාශයන් බවයි.

මේ වන විට ජාතික පාසැල්වල විදුහල්පතිවරුන් නොමැති බව ප්‍රකාශ කළ ද ශ්‍රේණිධාරීන් විදුහල්පතිවරුන් රාජකාරි ආවරණය කරන බවත් ඉදිරියේදී පුරප්පාඩු සහිත විදුහල්පති තනතුරු ගැසට් කරමින් පාසැල්වල විනය සහ ප්‍රථිපල ඉහළ නැංවීමට කටයුතු කළ සහ අධ්‍යාපන සුදුසුකම් සහිත විදුහල්පතිවරුන් ජ්‍යෙෂ්ඨත්වයට ද මුල් තැන ලබා දෙමින් පත් කිරීමට බලාපොරොත්තු වන බවත් ඒ සඳහා පිළිගත් ලකුණු ලබාදීමේ ක්‍රමවේදයක් සකස් කිරීමට පියවර ගෙන ඇති බවත් අධ්‍යාපන අමාත්‍ය අකිල විරාජ් කාරියවසම් මහතා එහිදී සඳහන් කළා.

 

කෙසේ උවද උප ගුරුවරුන් 4000කට අධික ප්‍රමාණයක් දේශපාලන හිතවත්කම් මත වැඩබලන විදුහල්පතිවරුන් ලෙස පාසැල්වලට පත් කළ විට අදාල වෘත්තීය සමිති කුමක් සිදු කළේද යන්න පිළිබඳව අමාත්‍යවරයා මෙහිදී ප්‍රශ්ණ කළා.

එමෙන්ම අධ්‍යාපන ක්ෂේත්‍රයේ පසුගිය කාලයේ සිදු වූ බොහෝ අක්‍රමිකතා හමුවේ මුනිවත ආරක්ෂා කළ ඇතැම් කණ්ඩායම් අද අධ්‍යාපනයේ සාර්ථකත්වය හමුවේ තම ජනප්‍රියත්වය උදෙසා විවිද පදනම් විරහිත චෝදනා එල්ල කරන බව අමාත්‍යවරයා එහිදී සඳහන් කළා.

 

රටක ක්‍රීඩාව දියුණු කිරීම වෙනුවෙන් සිදුකරන ආයෝජනය, අධ්‍යාපනය වෙනුවෙන් සිදුකරන ආයෝජනය තරම්ම වැදගත් වන බව අධ්‍යාපන අමාත්‍ය අකිල විරාජ් කාරියවසම් මහතා පවසනවා.

අමාත්‍යවරයා පෙන්වා දෙන්නේ නීරෝගීමත් සිසු පරපුරක් බිහිකිරීම උදෙසා පාසල් පද්ධතිය තුළ ක්‍රීඩාව දියුණු කිරීම අතිශයින් වැදගත් වන බවයි.

කොළඹ ටාජ් සමුද්‍ර හෝටලයේ දී පැවති, 2018 සමස්ත ලංකා පාසල් සහය දිවීමේ සැණකෙලිය පිළිබඳව දැනුවත් කිරීමේ මාධ්‍ය හමුවට එක්වෙමින් අමාත්‍යවරයා මේ අදහස් පළ කළා.

පාසල් අධ්‍යාපනය ලබන සෑම දරුවෙකුම පාසල තුළ කුමන හෝ ක්‍රීඩාවක නිරත විය යුතු බව අනිවාර්ය කරමින් අධ්‍යාපන අමාත්‍යාංශය විසින් චක්‍රලේඛයක් නිකුත් කර ඇති බවත් දරුවන් ක්‍රීඩාව වෙත නැඹුරු කරවීම උදෙසා අධ්‍යාපන අමාත්‍යාංශය විසින් විවිධ වැඩසටහන් සහ ව්‍යාපෘති මේ වන විට ක්‍රියාත්මක කරමින් පවතින බවත් අමාත්‍යවරයා මෙහිදී සඳහන් කළා.

අමාත්‍යවරයා පෙන්වා දුන්නේ, ක්‍රීඩාව ජනප්‍රිය කරවීම තුළින් ශක්තිමත් මෙන්ම නිරෝගීමත් අනාගත පරපුරක් නිර්මාණය කර රට තිරසර සංවර්ධනය කරා ලඟ කරවිමේ ඉලක්ක සපුරාගැනීමට ද හැකි වන බවයි.

අධ්‍යාපන අමාත්‍යාංශයේ සෞඛ්‍ය, ශාරීරික අධ්‍යාපන හා ක්‍රීඩා ශාඛාව මගින් සංවිධාන කරනු ලබන, 2018 සමස්ථ ලංකා සහය දිවීමේ සැණකෙළිය මේ මස 24,25 සහ 26 යන දිනයන් හී දී බදුල්ල වින්සන්ට් ඩයස් ක්‍රීඩාංගණයේ දී පැවත්වීමට නියමිතයි.

 

 

 

 

මෑතකාලීන ව දිවයිනට බල පෑ ගංවතුර හා හදිසි ආපදාවන්ගෙන් හානියට පත් ප්‍රදේශවල පිහිටි පුස්තකාල සඳහා ලීබඩු උපකරණ හා පොත් පරිත්‍යාග කිරීමට ජාතික පුස්තකාල හා ප්‍රලේඛන සේවා මණ්ඩලය පියවර ගෙන තිබෙනවා. ජාතික පුස්තකාල හා ප්‍රලේඛන සේවා මණ්ඩලයේ ග්‍රාමීය පුස්තකාල සංවර්ධන ව්‍යාපෘතිය මඟින් ක්‍රියාවට නංවන ලද මෙම වැඩසටහන යටතේ ගාල්ල, කලුතර, මාතර, රත්නපුර දිස්ත්‍රික්කවල ගංවතුර හා හදිසි ආපදාවන්ගෙන් හානියට පත්ව ඇති බවට හඳුනාගත් පුස්තකාල 18කට ලීබඩු උපකරණ හා පුස්තකාල පොත් ලබාදීමට කටයුතු යොදා තිබෙනවා.

මීට අමතර ව දිවයින පුරා පිහිටි පුස්තකාල අතරින්, හඳුනාගත් පාසල් පුස්තකාල 60ක් සහ පිරිවෙන් පුස්තකාල, ආරක්ෂක හමුදාව යටතේ පාලනය වන පුස්තකාල සහ විවිධ අමාත්‍යාංශ යටතේ ඇති පුස්තකාල 100කට අධික ප්‍රමාණයකට ‍පොත් ලබාදීමට ද සැලසුම් කර තිබෙනවා.

කියවීම පුරුද්දක් කරගත් මිනිසුන් සපිරි සමාජයක් ගොඩනැඟීම වෙනුවෙන් අධ්‍යාපන අමාත්‍ය අකිල විරාජ් කාරියවසම් මහතාගේ උපදෙස් පරිදි කියවීම් ප්‍රවර්ධන ක්‍රියාමාර්ග රැසක් මෑතකාලීනව ක්‍රියාවට නංවා ඇති අතර, පාසල් පුස්තකාලවලට ගුණාත්මක පොත් ලබාදීම වෙනුවෙන් රුපියල් මිලියන 700ක් ද ලබා දී තිබෙනවා. එමෙන් ම කියවීම දිරිගැන්වීම වෙනුවෙන් පසුගියදා කලණ මිතුරු-පොත් සුමිතුරු වැඩසටහන ද පාසල් පද්ධතිය වෙත හදුන්වා දෙනු ලැබුවා.

ග්‍රාමීය පුස්තකාල සංවර්ධන ව්‍යාපෘතිය යටතේ ක්‍රියාත්මක වන පුස්තකාල සඳහා ලී බඩු උපකරණ හා පොත් පරිත්‍යාග කිරීමේ මෙම වැඩසටහන ජුනි මස 13 වැනි දා අධ්‍යාපන අමාත්‍ය අකිල විරාජ් කාරියවසම් මහතාගේ ප්‍රධානත්වයෙන් කොළඹ, ජාතික පුස්තකාල හා ප්‍රලේඛන සේවා මණ්ඩලයේ පුස්තකාල ශ්‍රවණාගාරයේ දී පැවැත්වීමට නියමිතයි.

එක්සත් ජාතික පක්ෂයේ නව මහලේකම් අමාත්‍ය අකිල විරාජ් කාරියවසම් මහතා සුබ මොහොතින් සිය රාජකාරියෙහි නිල කටයුතු ආරම්භ කළා. ඒ ඊයේ (07) උදෑසන මහා සංඝරත්නයේ සෙත් පිරිත් සජ්ඣායනා මධ්‍යයේයි. සර්ව ආගමික වතාවත් ද මෙහි දී සිදු කෙරුණා.

මීට සමගාමීව එක්සත් ජාතික පක්ෂය ජයග්‍රහණයන් මතින් විජයග්‍රහණයන් කරා ගෙනයාමේ අරමුණින් සංවිධානය කෙරුණු පුනරුදයට ඇරඹුම වැඩසටහන යටතේ සිරිකොත පක්ෂ මූලස්ථානයේ දී සර්වරාත්‍රික පරිත්‍රාණ ධර්ම දේශනායක් ද පැවැත්වුණා.එක්සත් ජාතික පක්ෂයේ මිය ගිය නායකයින්,පක්ෂය වෙනුවෙන් විවිධ කැපකිරීම් සහ විවිධ පරිත්‍යාගයන් සිදුකළ ජනතා නායකයින් සහ සාමාජිකයන් සිහිපත් කරමින් , සියලු පාක්ෂිකයන්ට මෙන් ම රටවැසියන්ට සෙත් පැතීම මෙහි අරමුණ වුණා.

පරිත්‍රාණ ධර්ම දේශනාව අවසන් කොට මහා සංඝරත්නයේ ආශිර්වාද ලබාගැනීමෙන් අනතුරුව නව පක්ෂ මහ ලේකම්වරයා සිය රාජකාරී කටයුතු නිල වශයෙන් ආරම්භ කිරීමේ චාම් උත්සවය පැවැත්වුණා.

ධුරයේ රාජකාරී ආරම්භ කිරීමෙන් අනතුරුව එක්සත් ජාතික පක්ෂ මහ ලේකම් අමාත්‍ය අකිල විරාජ් කාරියවසම් මහතා සියක් නමක් විෂයෙහි සූදානම් කරන ලද හීල් දානය පූජා කිරීමේ පින්කමකට සහභාගී වුණා.

අනතුරුව එක්සත් ජාතික පක්ෂ නායකයින්ගේ පිළිරූවලට පුෂ්පෝපහාර දැක්වූ නව මහ ලේකම්වරයා ජාතික සේවක සංගමයේ ප්‍රධාන කාර්යාලය වෙත ගොස් ජාතික සේවක සංගමයේ නිර්මාතෘ එක්සත් ජාතික පක්ෂයේ හිටපු නායකයෙකු වු දිවංගත ජනාධිපති ජේ ආර් ජයවර්ධන මැතිදුන්ගේ පිළිරුවට ද පුෂ්පෝපහාර දැක්වූවා.

ඉන් අනතුරුව නැවත සිරිකොත පක්ෂ මූලස්ථානය වෙත පැමිණි එක්සත් ජාතික පක්ෂයේ මහ ලේකම්වරයා පක්ෂයේ මැති ඇමැතිවරුන් සහ පක්ෂ සාමාජිකයන් විසින් මහත් හරසරින් පිළිගනු ලැබුවා.

 

 

ඉතිහාස විෂය, පාසල් විෂය මාලාවෙන් ඉවත් කරන බවට පැතිර යන චෝදනා සම්පූර්ණයෙන් අසත්‍යය බවත්, එවන් කිසිදු තීරණයක් අධ්‍යාපන අමාත්‍යාංශය විසින් ගෙන නොමැති බවත් අධ්‍යාපන අමාත්‍ය අකිල විරාජ් කාරියවසම් මහතා පවසනවා. අමාත්‍යවරයා පැවසුවේ, විවිධ පාර්ශව විසින් විවිධ පටු දේශපාලන අරමුණු මත පදනම්ව, මහා සංඝරත්නය පවා නොමග යවමින් සිදුකරන අසත්‍යය ප්‍රකාශ පිළිබඳව තමන් විෂයභාර අමාත්‍යවරයා ලෙස දැඩි ‍සේ කණගාටු වන අතර එම ප්‍රකාශ පිලිකුලෙන් යුතුව හෙළා දකින බවයි. 2018 ආසියානු කණිෂ්ඨ මලල ක්‍රීඩා තරඟාවලියට සහභාගී වූ ක්‍රීඩක ක්‍රීඩිකාවන් සහ ගුරුභවතුන් ඇගයීම නිමිත්තෙන් අධ්‍යාපන අමාත්‍යාංශ පරිශ්‍රයේ දී පැවති උත්සවයකට එක්වෙමින් අමාත්‍යවරයා මේ අදහස් පළ කළා.

අමාත්‍යවරයා පෙන්වා දෙන්නේ කිනම් හෝ පාර්ශවයක් විසින් මෙම කරුණ සම්බන්ධයෙන් කිසියම් දේශපාලන කණ්ඩායමකට වාසිදායක මතයක් මාධ්‍යය තුළ ගොඩනැගීමට උත්සහ කරමින් සිටින බවයි. මෙවන් කරණු හරහා දේශපාලන ජයග්‍රහණ ලබාගැනීමට උත්සහ කරන බංකොලොත් දේශපාලඥයින්, සිය පටු දේශපාලන වාසි සඳහා දරුවන්ගේ අධ්‍යාපනය භාවිතා කිරීමට උත්සහ කිරීම කිසිසේත් අනුමත කළ නොහැකි බවත්, මෙවන් දුර්වල ක්‍රියාමාර්ග හරහා වත්මන් රජයේත්, අධ්‍යාපන අමාත්‍යාංශයෙත් ඉදිරි ගමන කිසිසේත්ම වැළැක්විය නොහැකි බවත් අධ්‍යාපන අමාත්‍ය අකිල විරාජ් කාරියවසම් මහතා කියා සිටියා.

අනාගත ලෝකයට ගැලපෙන පරිදි විෂය මාලා නවීකරණය කිරීමේ කර්තව්‍යය අධ්‍යාපන අමාත්‍යාංශය විසින් මේ වන විට ආරම්භ කොට ඇති බවත්, එහි දී ඉතිහාසය, සාහිත්‍යය, භාෂාව, දේශීයත්වය සහ අපේ කම සුරැකීමේ අනිවාර්යය වගිකීම පෙරදැරි කරගනිමින් අධ්‍යාපන අමාත්‍යාංශය එම කාර්යය ඉටු කරන බවත් අධ්‍යාපන අමාත්‍යවරයා මෙහි දී වැඩි දුරටත් සඳහන් කළා. තවද, ඇතැම් විට ඉතිහාසය විෂයට වෙන් කෙරෙණ කාලපරිච්ඡේද ගණන ඉදිරියේ දී වැඩි කිරීමට ඉඩ ඇති බවයි අමාත්‍යවරයා මෙහිදී සඳහන් කළේ.

අධ්‍යාපන අමාත්‍යාංශයේ ලේකම් සුනිල් හෙට්ටිආරච්චි, අතිරේක ලේකම් සේනානි හේවගේ යන මහත්වරුන් සහ නිලධාරීන් රැසක් මේ අවස්ථාවට එක්ව සිටියා.

 

දේශපාලන හේතූන් මත පසුගිය සමයේ දී සමෘද්ධි දීමනාව ලක්ෂ දෙකකට ලැබී නොමැති බවත්, එම සමෘද්ධිලාභීන්ට නැවත එය ලබා දීමට කඩිනමින් පියවර ගන්නා බවත් එක්සත් ජාතික පක්ෂයේ මහලේකම් අමාත්‍ය අකිල විරාජ් කාරියවසම් මහතා පවසනවා. 
 
අමාත්‍යවරයා මේ අදහස් පළ කළේ පසුගිය දා කුරුණෑගල, හිරියාල එක්සත් ජාතික පක්ෂ කාර්යාලයේ දී පැවති රැස්වීමකට එක්වෙමින්. 
 
එමෙන්ම සමෘද්ධි සහනාධාරය නැවත ලබාදීමේ ක්‍රියාවලියට සමගාමීව සමෘද්ධිය ආශ්‍රිත රැකියා ලබාදීමේ කටයුත්ත ද සිදුකරීමට අපේක්ෂා කරන බව මහලේකම්වරයා මෙහිදී ප්‍රකාශ කළා. 
 
අමාත්‍ය අකිල විරාජ් කාරියවසම් මහතා මෙහි දී පෙන්වා දුන්නේ, සියලු අර්බුධ, ගැටලුකාරී තත්ත්වයන් සහ සියලු බෙදීම් නිවැරදි කොට ගෙන, එක්සත්ව, එක්සිත්ව, එක් පක්ෂයක් ලෙසින් 2020 දී තනි එක්සත් ජාතික පක්ෂ රජයක් පිහිටුවා ජනතා අපේක්ෂා ඉටු කිරීමේ අරමුණ සහිත මැතිවරණ සටනට දැන් පක්ෂය අවතීර්ණ වී ඇති බවයි.
 
 
එමෙන්ම, කිනම් මාධ්‍ය සංදර්ශන සහිතව කටයුතු කළ ද පොදු ජන පෙරමුණේ අභ්‍යන්තර අර්බුදය දැන් සමාජය ඉදිරියේ නිරාවරණය වී ඇති බවත්, පසුගිය දා පාර්ලිමේන්තුවේ දී පැවති නියෝජ්‍ය කථානායකවරයා පත් කිරීමේ ඡන්ද විමසීම් අවස්ථාවේ දී එය හොඳින් පෙනී ගිය බවත් මහලේකම්වරයා මෙහි දී පැවසුවා. 
 
පැණි  වරකා ගහටත් හෙන ගහන්නා සේ අද පොහොට්ටු පක්ෂයේ අභ්‍යන්තර ගැටලුකාරී තත්ත්වයන් ජනතාවට දැකගත හැකි බව ද අමාත්‍ය අකිල විරාජ් කාරියවසම් මහතා මෙහිදී සඳහන් කළා.
 
 

Search